AZƏRBAYCAN RESPUBLİKASI BAŞ PROKURORLUĞU MƏTBUAT XİDMƏTİNİN MƏLUMATI
Sentyabrın 26-da Azərbaycan Respublikası Baş Prokurorluğunda Azərbaycanda işgüzar səfərdə olan Litva Respublikasının Ədliyyə naziri Vitautas Markyaviçus və onu müşayiət edən nümayəndə heyəti ilə görüş keçirilmişdir.
Qonaqları səmimiyyətlə salamlayan Baş prokuror Zakir Qaralov Litva və Azərbaycan Respublikaları, o cümlədən, ölkələrin hüquq mühafizə orqanları arasında əlaqələrin möhkəmləndirilməsinin vacibliyini vurğulamış, Ədliyyə Nazirlikləri arasında Əməkdaşlıq Proqramının imzalanmasının ikitərəfli əlaqələrimizin inkişafına xidmət edən vacib hadisə kimi qiymətləndirmişdir.
Bildirilmişdir ki, bu Proqramın imzalanması Litva və Azərbaycan Respublikaları arasında hələ 2001-ci ilin oktyabr ayında bağlanmış Hüquqi yardım və mülki, ailə və cinayət işləri üzrə hüquqi münasibətlər haqqında Müqavilənin məntiqi davamı olaraq, iki ölkənin hüquq mühafizə orqanlarının səmərəli əməkdaşlığı üçün zəruri hüquqi baza yaratmışdır.
Ölkəmizin Prezidenti cənab Heydər Əliyevin rəhbərliyi altında respublikamızda demokratik dəyərlərə, xalqımızın zəngin dövlətçilik ənənələrinə uyğun həyata keçirilən məhkəmə-hüquq islahatları barədə qonaqlara ətraflı məlumat verən Baş prokuror Azərbaycan prokurorluğunun cəmiyyətdə rolu və yerini, hüquqi statusunu müəyyənləşdirən yeni qanunvericilik bazasının yaradılması istiqamətində görülən işləri, son dövrlərdə prokurorluq orqanlarında həyata keçirilən islahatları, struktur dəyişiklikləri və kadr siyasəti ilə bağlı tədbirləri, o cümlədən, prokurorluğa qulluğa qəbulun test imtahanları və söhbətdən ibarət olan müsabiqə əsasında həyata keçirilməsinin nəzərdə tutulmasını, test imtahanlarının artıq tam aşkarlıq şəraitində, şəffaf prosedurlarla obyektiv keçməsini onların diqqətinə çatdırmışdır.
Səfər zamanı göstərilən xüsusi diqqət və səmimi qonaqpərvərliyə görə dərin minnətdarlığını bildirən Litva Respublikasının Ədliyə naziri Vitautas Markyaviçus ölkələrimizin ədliyyə və digər hüquq-mühafizə orqanları arasında daim inkişafda olan ikitərəfli əlaqələrin tarixi, bu əlaqələrin inkişafında Azərbaycan və Litva Respublikaları Ədliyyə Nazirlikləri arasında imzalanmış sənədlərin əhəmiyyəti barədə danışmış, əməkdaşlığın əhatə dairəsinin genişləndirilməsinin vacibliyini qeyd etmişdir.
Azərbaycan Prokurorluğu orqanlarında aparılan islahatları müsbət qiymətləndirən Vitautas Markyaviçus ölkələrimizin ədliyyə, o cümlədən, prokurorluq orqanları arasında ikitərəfli əlaqələrin perspektivləri barədə fikirlərini açıqlamış, onu maraqlandıran məsələlər üzrə ətraflı cavablardan və verilən məlumatlardan öz razılığını bildirmişdir.
Görüşdə prokurorluq, ədliyyə və məhkəmə orqanları işçilərinin fəaliyyətini nizamlayan normaların tətbiqi, habelə ixtisasartırma kurslarında tədrisin keyfiyyətinin yüksəldilməsi məsələsi üzrə də fikir mübadiləsi aparılmışdır.
Bölmənin digər xəbərləri
