“AZƏRBAYCAN RESPUBLİKASI ƏHALİSİNİN DÖVLƏT REYESTRİ HAQQINDA” QANUN LAYİHƏSİ İKİNCİ OXUNUŞA HAZIRDIR
İnsan hüquqları daimi komissiyanın sədri Rəbiyyət Aslanova demişdir ki, işçi qrupu layihənin birinci oxunuş müzakirəsi zamanı səslənmiş irad və təkliflərin əksəriyyətini nəzərə almışdır. Bu sahədə beynəlxalq təcrübə və inkişaf etmiş ölkələrin qanunvericiliyi diqqətlə öyrənilmiş və sənəd əsaslı surətdə təkmilləşdirilmişdir.
Sonra Milli Məclis Aparatının dövlət quruculuğu üzrə qanunvericilik şöbəsinin əməkdaşı Elçin Quliyev layihə ilə bağlı ətraflı məlumat vermişdir. Bildirmişdir ki, bu qanun Azərbaycan Respublikası əhalisinin dövlət reyestrinin müasir informasiya texnologiyaları vasitəsilə formalaşdırılmasını, aparılmasını, istifadəsini və informasiya mühafizəsinin hüquqi və təşkilati əsaslarını müəyyən edəcəkdir. Layihədə əsas anlayışlarla yanaşı, dövlət reyestrinin aparılmasının əsas məqsədi, bu sahədə qanunvericilik, dövlət reyestrinin tərkibi və digər müddəalar əksini tapmışdır.
Müzakirələr zamanı deputatlar və dəvət olunmuş şəxslər qanunun əhəmiyyətindən danışmış, əhalinin sayının, tərkibinin və yerləşməsinin müəyyənləşdirilməsində onun rolundan bəhs etmişlər. Sonda layihənin Milli Məclisin müzakirəsinə çıxarılması qərara alınmışdır.
Bölmənin digər xəbərləri
