AZƏRBAYCAN RESPUBLİKASI HƏRBİ PROKURORLUĞU NÜMAYƏNDƏ HEYƏTİNİN KİYEVƏ SƏFƏRİ MƏHSULDAR OLMUŞDUR
AZƏRTAC xəbər verir ki, Azərbaycan Respublikası baş prokurorunun müavini-respublika hərbi prokuroru, ədliyyə general-leytenantı Xanlar Vəliyevin rəhbərliyi ilə nümayəndə heyəti Kiyevdə səfərdə olmuşdur. Nümayəndə heyəti səfər çərçivəsində Ukrayna baş prokurorunun müavini Nikolay Qolomşa ilə görüşmüşdür. Azərbaycanın hərbi prokuroru Xanlar Vəliyev diqqətə çatdırmışdır ki, ümummilli lider Heydər Əliyevin əsasını qoyduğu və Prezident İlham Əliyev tərəfindən uğurla davam etdirilən siyasət nəticəsində ölkəmizin yüksək sürətli iqtisadi inkişafı dövlətimizin qarşısında duran problemlərin həllinə etibarlı zəmin yaratmışdır. Azərbaycanın dünyaya inteqrasiyası sürətlənmiş, beynəlxalq təşkilatlarla əməkdaşlığı daha da genişlənmişdir.
Müstəqillik illərində Azərbaycanda həyata keçirilən məhkəmə-hüquq islahatları barədə ətraflı məlumat verən X.Vəliyev, prokurorluğun sivil və müasir standartlar səviyyəsində işləməyə qadir olan demokratik dövlət təsisatı kimi formalaşdırılması istiqamətində görülən tədbirləri diqqətə çatdırmış, ölkəmizdə məhkəmə-hüquq sisteminin müasirləşdirilməsi üçün dövlət səviyyəsində görülən tədbirlərdən, eləcə də Azərbaycan Hərbi Prokurorluğunun tarixi, strukturu, fəaliyyəti ilə bağlı məlumat vermişdir.
Respublikanın hərbi prokuroru Ermənistanın Azərbaycana hərbi təcavüzü və onun ağır nəticələri, bir milyondan çox qaçqın və məcburi köçkünün olduğu, erməni terrorizmi nəticəsində azərbaycanlıların soyqırımına məruz qaldığını bildirmiş, törədilmiş bu ağır cinayətlərin istintaqının hərbi prokurorluq tərəfindən aparıldığını qeyd etmişdir.
Nümayəndə heyətinin rəhbəri Xanlar Vəliyev Azərbaycan Respublikasının baş prokuroru Zakir Qaralovun Ukraynanın baş prokuroruna ünvanladığı məktubu təqdim etmiş, səmimi qəbul üçün minnətdarlığını bildirmişdir. Ukrayna baş prokurorunun müavini Nikolay Qolomşa Azərbaycanın nümayəndə heyətinin səfərini yüksək qiymətləndirərək, Ukraynanın hərbi prokurorluğu rəhbərliyinin Azərbaycana dəvətindən məmnun olduğunu və cari il ərzində bu səfərin reallaşacağını bildirmişdir.
Sonra hərbi prokuror Xanlar Vəliyev və nümayəndə heyəti Ukrayna baş prokurorluğunun hərbi prokurorluqlar üzrə baş idarəsində olmuş, idarə rəisi Yuri Viytev ilə görüşmüş, hərbi prokurorluq və onun strukturu barədə geniş məlumat vermişdir.
Səfər çərçivəsində Azərbaycan nümayəndə heyəti, həmçinin region və qarnizon hərbi prokurorluqlarında da olmuş, şəxsi heyətlə görüşərək söhbət etmişdir. Görüşlərdə prokurorluq orqanları arasında münasibətlərin inkişafı, təcrübə mübadiləsi, habelə tərəfləri maraqlandıran digər məsələlər müzakirə edilmiş, Azərbaycan torpaqlarının Ermənistan tərəfindən işğal edilməsini, azərbaycanlı əhalinin soyqırımına məruz qalmasını əks etdirən kitablar və videomateriallar təqdim olunmuşdur.
######
Bölmənin digər xəbərləri
