RƏSMİ XRONİKA
AZƏRBAYCAN RESPUBLİKASI PREZİDENTİNİN MƏTBUAT XİDMƏTİNİN MƏLUMATI
Mayın 10-da Rusiya Federasiyasının Prezidenti Vladimir Putin Ankaraya - Gülhanə Hərbi Tibbi Akademiyasına zəng edərək, Azərbaycan Respublikasının Prezidenti Heydər Əliyevi 80 illik yubileyi münasibətilə səmimi qəlbdən təbrik etmiş, ona uzun ömür, cansağlığı, Azərbaycanın rifahı və çiçəklənməsi naminə yeni zirvələr arzulamışdır.
Cənab Vladimir Putin mayın 10-da imzaladığı fərman haqqında dövlətimizin başçısına məlumat verərək demişdir ki, Azərbaycan Prezidenti Heydər Əliyev Rusiyanın ən yüksək mükafatı - Müqəddəs Apostol Andrey Pervozvannı ordeni ilə təltif edilmiş və Rusiya mətbuatı artıq bu xəbəri geniş yaymışdır.
Azərbaycan Respublikasının Prezidenti Heydər Əliyev bu yüksək mükafata görə Rusiya Prezidenti Vladimir Putinə təşəkkürünü bildirmişdir.
Səmimilik şəraitində keçən telefon söhbəti zamanı ikitərəfli münasibətlər və dünya siyasətinin bir sıra qlobal məsələləri barədə müzakirələr aparılmışdır.
Prezident Vladimir Putin Azərbaycan Prezidenti Heydər Əliyevlə yaxın vaxtlarda görüşəcəyinə ümidvar olduğunu bildirmişdir.