AZƏRBAYCAN RESPUBLİKASI XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Azərbaycan Respublikasının Xarici İşlər Nazirliyinə daxil olan məlumata əsasən, qondarma Dağlıq Qarabağ Respublikasının Avstraliyanın Sidney şəhərində guya daimi nümayəndəliyi açılmış və nümayəndəliyin rəhbəri Varujan İskəndəryan təyin edilmişdir.
Azərbaycan Respublikasının Xarici İşlər Nazirliyi qeyd olunan məsələ ilə bağlı Azərbaycanın Ankaradakı səfirliyinə müvafiq təlimatlar vermişdir. Səfirlikdən daxil olmuş məlumata əsasən, Avstraliyanın Ankaradakı Səfiri cənab C.Filipplə keçirilmiş görüş zamanı aydın olmuşdu ki, qondarma qurumun Avstraliyanın Sidney şəhərində heç bir nümayəndəliyi fəaliyyət göstərmir. Bu, Avstraliya tərəfinin Azərbaycanın müvafiq xahişi nəticəsində apardığı araşdırmalar zamanı müəyyən edilmişdir. Öz növbəsində Avstraliyanın Ankaradakı səfiri cənab Filipp ölkəsinin Azərbaycan Respublikasının ərazi bütövlüyünü, bütün əraziləri, o cümlədən Dağlıq Qarabağ üzərində suveren hüquqlarını tanıdığını və qondarma “DQR” ilə heç bir əlaqələrə malik olmadığını bildirmişdir. Bundan başqa Səfir qeyd etmişdir ki, belə bir nümayəndəliyin fəaliyyəti aşkar edilərsə, Avstraliya qanunlarına əsasən onun fəaliyyəti dərhal dayandırılacaq, təmsilçi isə qanun qarşısında cavab verməli olacaqdır.
Beləliklə, daha bir erməni mifi dağılmışdır.
Bölmənin digər xəbərləri
