RƏSMİ XRONİKA
AZƏRBAYCAN RESPUBLİKASININ DAXİLİ İŞLƏR ORQANLARININ ŞƏXSİ HEYƏTİNƏ
Hörmətli polis əməkdaşları və veteranlar! Sizi Azərbaycan polisinin yaranmasının 85-ci ildönümü münasibətilə səmimi qəlbdən təbrik edirəm. 1918-ci il iyulun 2-də Azərbaycan Xalq Cümhuriyyəti hökumətinin qərarı ilə müstəqil dövlətin zəruri təsisatlarından biri olan milli polis orqanlarının əsası qoyulmuşdur. Bu gün özünün şanlı yubileyini qeyd edən Azərbaycan polisi çətin və şərəfli yol keçərək, xalqına və dövlətinə sədaqətlə xidmət etmiş, əhalinin dinc və təhlükəsiz yaşayışının qorunmasında əzmkarlıq nümayiş etdirmişdir. Öz inkişaf yolunu asayişi mühafizə dəstələrinin təşkilindən başlayan Azərbaycan polisi 1918-1920-ci illərdə ilk müstəqil Azərbaycan dövlətinin formalaşmasında, milli maraqların qorunmasında mühüm rol oynamış, müstəqilliyin müdafiəsinin ön sıralarında olmuşdur. Azərbaycan Xalq Cümhuriyyətinin süqutundan sonra SSRİ dövründə fəaliyyət göstərən sovet milisi sosialist quruluşuna uyğun, mahiyyətcə sinfi xarakter daşıyan orqan idi və ondan siyasi məqsədlər üçün istifadə edilirdi. Lakin buna baxmayaraq, həmin dövrdə Azərbaycanın daxili işlər orqanları böyük təcrübə qazanmış, yüksək bilik və peşə hazırlığı əldə etmiş, təşkilati cəhətdən möhkəmlənmişdir. 1991-ci ildə müstəqilliyini bərpa etmiş Azərbaycan Respublikası öz tarixinin mürəkkəb dövrünə qədəm qoymuşdu. Müstəqilliyin ilk illərində mövcud olan qeyri-sabit ictimai-siyasi vəziyyət, dağıdıcı proseslər nəticəsində qanunlara itaətsizlik, insan hüquqlarının kütləvi surətdə pozulması, hərc-mərclik, özbaşınalıq və bu kimi digər hallar dözülməz həddə çatmışdır. Saysız-hesabsız qanunsuz silahlı dəstələr və ayrı-ayrı şəxslərdə olan silah-sursat respublikanın kriminogen durumunu xeyli gərginləşdirmiş, əhalidə vahimə və qorxu hissi, dövlət orqanlarına inamsızlıq yaratmışdı. Əslində cinayətkarlıqla mübarizə aparmalı, hüquq qaydalarını qorumalı olan daxili işlər orqanlarının tərkibində həmin illərdə dövlətə tabe olmayan cinayətkar silahlı dəstələr yaranmış, kadr siyasəti ciddi şəkildə təhrif olunmuş, polisə səriştəsiz, yararsız, əməkdaş adına ləkə gətirən və hətta əvvəllər cinayət törətmiş şəxslər qəbul edilmiş və rəhbər vəzifələrə irəli çəkilmişdi. Bütün bunlar əhali arasında polis orqanlarının nüfuzdan düşməsinə gətirib çıxarmışdı. Dövlətin mühüm qurumlarından biri olan polisin fəaliyyətinə bu cür səthi və səriştəsiz münasibət cinayətlərin kəskin artmasına öz təsirini göstərmiş, cinayətkarlığa qarşı mübarizə və sabitliyin bərqərar olunması işini səmərəsiz etmişdir. Son on il ərzində daxili işlər orqanlarına tələbkarlığın artırılması, nizam-intizamın gücləndirilməsi, şəxsi heyətin saflaşdırılması, polis orqanlarına dövlət tərəfindən mütəmadi qayğı göstərilməsi və onun maddi-texniki təminatının möhkəmləndirilməsi nəticəsində polisin fəaliyyətində əsaslı dönüş yarandı. Bu da öz növbəsində cinayətlərin qarşısının alınmasına, qanunsuz silahlı dəstələrin zərərsizləşdirilməsinə, cəmiyyətdə əmin-amanlığın, sabitliyin, ictimai təhlükəsizliyin təmin olunmasına öz müsbət təsirini göstərmişdir. Bütün bunlar görülmüş tədbirlərin, o cümlədən də polis əməkdaşlarının gərgin əməyinin nəticəsində mümkün olmuşdur. Müstəqil Azərbaycan dövlətinin möhkəmlənməsində, respublikamızın suverenliyinə və torpaqlarımızın ərazi bütövlüyünə qarşı erməni silahlı qüvvələri tərəfindən təcavüzlərin dəf edilməsində, vətəndaş sülhünün bərqərar olunmasında, qanunun aliliyinin təmin edilməsində Azərbaycan daxili işlər orqanlarının və onun əsas tərkib hissəsi olan polisin xidmətləri danılmazdır. Bu gün Azərbaycan polisi özünün inkişaf və təkmilləşmə mərhələsini yaşayır. Hüquq mühafizə orqanları sistemində mühüm yer tutan polisin fəaliyyətini nizama salan onlarla qanunlar və digər normativ hüquqi aktlar qəbul edilmişdir. Yeni qanunvericilik polisin ictimai qaydanın qorunması, ictimai təhlükəsizliyin təmin edilməsi, cinayətlərin qarşısının alınması, insanların həyat və sağlamlığının, vətəndaşların hüquq və azadlıqlarının təminatı, onların hüquqazidd əməllərdən müdafiəsi kimi funksiyalarını dəqiq müəyyən etmişdir. Bu gün ölkəmizdə polisin fəaliyyəti, bütünlüklə hüquq sisteminin vəziyyəti beynəlxalq standartlara cavab verir. Eyni zamanda dövlətimizin güclənməsi, demokratiyanın inkişafı, qanunun aliliyinin təmin edilməsi sahəsində biz əldə edilmiş nailiyyətlərlə kifayətlənməməliyik. Bu sahədə fəaliyyəti daha da gücləndirmək üçün hər bir polis əməkdaşı öz vəzifələrini icra edərkən qanunçuluğa və müəyyən olunmuş davranış qaydalarına ciddi riayət etməli, ictimai asayişin qorunmasında və cinayətkarlıqla mübarizədə barışmaz və qətiyyətli olmalı, insan hüquq və azadlıqlarının keşiyində sayıqlıqla durmalı, vətəndaşların etimad və inamını qazanmalıdır. Əmin olduğumu bildirirəm ki, dövlətçiliyə və peşə borcuna sadiq olan Azərbaycan polisi bundan sonra da xalqa və dövlətə sədaqətlə xidmət edəcəkdir! Heydər Əliyev, Azərbaycan Respublikasının Prezidenti. Bakı şəhəri, 1 iyul 2003-cü il.