AZƏRBAYCAN RESPUBLIKASININ NAZIRLƏR KABINETINDƏ
“Sığorta haqqında” Azərbaycan Respublikası Qanununun tətbiqi ilə bağlı əlavə tədbirlər barədə” Azərbaycan Respublikası Prezidentinin 2000-ci il 4 may tarixli sərəncamının icrasını təmin etmək məqsədi ilə Azərbaycan Respublikasının Nazirlər Kabineti qərara almışdır ki, fəaliyyət göstərən sığortaçıların nizamnamə kapitalının minimum məbləği dövrlər üzrə mərhələli qaydada aşağıdakı kimi müəyyən edilsin:
- 01.01.2002-ci il tarixə 500 /beş yüz/ milyon manat;
- 01.07.2002-ci il tarixə 750 /yeddi yüz əlli/ milyon manat;
- 01.01.2003-cü il tarixə 1 /bir / milyard manat;
- 01.07.2003-cü il tarixə 1 /bir/ milyard manat 500 /beş yüz/ milyon manat;
- 01.01.2004-cü il tarixə 2 /iki/ milyard manat.
Yeni yaranan sığortaçılar üçün nizamnamə kapitalının minimum məbləği 2 /iki/ milyard manat, təkrar sığortaçılar üçün 5 /beş/ milyard manat müəyyən edilmişdir.
Azərbaycan Respublikası Nazirlər Kabinetinin “Sığortaçıların nizamnamə kapitalının minimum məbləğinin müəyyən edilməsi haqqında” 1999-cu il 7 iyun tarixli 90 nömrəli və “Azərbaycan Respublikası Nazirlər Kabinetinin 1999-cu il 7 iyun tarixli 90 nömrəli qərarına əlavələr edilməsi haqqında” 2000-ci il 4 avqust tarixli 132 nömrəli qərarları qüvvədən düşmüş hesab edilmişdir.
Bu qərar imzalandığı gündən qüvvəyə minmişdir.
Bu barədə AZƏRTAC-a Nazirlər Kabinetinin mətbuat xidmətindən məlumat vermişlər.
Bölmənin digər xəbərləri
