AZƏRBAYCAN RESPUBLİKASININ PREZİDENTİ HEYDƏR ƏLİYEV KİŞİNYOV ŞƏHƏRİNƏ YOLA DÜŞMÜŞDÜR
Azərbaycan Respublikasının Prezidenti Heydər Əliyev MDB-nin üzvü olan ölkələrin dövlət başçılarının Zirvə görüşündə iştirak etmək üçün oktyabrın 6-da Kişinyov şəhərinə yola düşmüşdür.
Dövlətimizin başçısı HEYDƏR ƏLİYEV yola düşməzdən əvvəl Binə beynəlxalq hava limanında kütləvi informasiya vasitələrinin nümayəndələrinə müsahibə verdi:
-Mənim səfərim artıq elan olunubdur, oktyabrın 7-də Kişinyovda Müstəqil Dövlətlər Birliyinə daxil olan ölkələrin dövlət başçıları görüşəcəklər. Bu, növbəti görüşdür. Orada Müstəqil Dövlətlər Birliyi ilə əlaqədar məsələlər müzakirə edəcəyik və görüşümüz bununla başa çatacaqdır.
Bu gün yəqin sizi maraqlandıran odur ki, orada Ermənistan Prezidenti Koçaryanla mənim təkbətək görüşüm olacaqdır. Ola bilər ki, Minsk qrupunun həmsədrləri də orada olsunlar. Onlar da bizimlə görüşmək istəyirlər. Bu qədər.
S U A L: Cənab Prezident, mətbuatımızda, ictimaiyyət arasında müharibə ilə əlaqədar kifayət qədər təbliğat aparılır. Ümumiyyətlə, əhval-ruhiyyə bambaşqadır. Müharibənin başlaması ehtimalı nə qədərdir?
C A V A B: Bilirsiniz, müharibə elə bir şey deyil ki, deməklə onu başlayasan. İndi təbliğat gedir, kim təbliğat aparır? Mən gördüm, ANS televiziyası dünən bu barədə çox təbliğat aparırdı. Belə təbliğat var. Bunu bir o qədər də şişirtmək lazım deyildir.
S U A L: Cənab Prezident, hər iki tərəf Sədərək görüşü barədə heç bir açıqlama vermədiyi bir vaxtda Vartan Oskanyan bəyan edib ki, həmin görüşdə razılaşdırılmış məqamlar razılaşdırılmayanlardan çoxdur.
C A V A B: İndi o deyir də. Biz razılaşmışıq ki, deyilməsin. Təəssüf ki, deyirlər. İndi mən nə deyim.
S U A L: Cənab Prezident, MDB-də iqtisadi və siyasi inteqrasiyanı Siz necə görürsünüz?
C A V A B: Pis deyil, gedir.
S U A L: Cənab Prezident, Minsk qrupunun həmsədrləri bu günlərdə Azərbaycanda olublar. Bu səfərin nəticələrini necə qiymətləndirirsiniz?
C A V A B: Biz onlarla görüşəcəyik.
S U A L: Cənab Prezident, Azərbaycan ordusunun döyüş hazırlığının səviyyəsini yüksək qiymətləndirirsinizmi?
C A V A B: Mən dəfələrlə demişəm ki, Azərbaycanın güclü ordusu var.
S U A L: Cənab Prezident, Azərbaycan gəmilərinin Xəzərdən Qara dənizə çıxmasına müəyyən məhdudiyyət var. Bu barədə danışıqlar aparılacaqmı?
C A V A B: Bundan mənim xəbərim yoxdur.
S U A L: Cənab Prezident, Rusiya Ermənistana silah satır. Buna münasibətinizi bilmək olarmı?
C A V A B: Keçmişdə silah satıb.
J U R N A L İ S T: Bu barədə yenə də informasiya verilir.
H E Y D Ə R Ə L İ Y E V: Yenidən onların silah satdıqlarını bilmirəm. Rusiyanın Ermənistanda çoxlu silahı var. Orada silah alıb-satmağa ehtiyac yoxdur.
J U R N A L İ S T: Cənab Prezident, Serj Sarkisyanla müqavilə imzalayıblar...
H E Y D Ə R Ə L İ Y E V: Elədir, bəli. İndi Rusiya hamıya silah satır.
J U R N A L İ S T: Bunu təzyiq kimi qiymətləndirmək olarmı?
H E Y D Ə R Ə L İ Y E V: Burada elə bir şey yoxdur. Rusiya hamıya silah satır. İstəsək, bizə də verəcək, satacaqdır.
S U A L: Cənab Prezident, müxalifətin Azərbaycan iqtidarı ilə danışıqlara getmək istəyinə münasibətinizi bildirərdinizmi?
C A V A B: Mən bilmirəm, onlar danışıqlara getmək istəyirlər, yoxsa yox. Sağ olun.
X X X
Prezident Heydər Əliyevi Milli Məclisin sədri Murtuz Ələsgərov, Prezidentin İcra Aparatının rəhbəri Ramiz Mehdiyev və digər rəsmi şəxlər yola saldılar.
Bölmənin digər xəbərləri
