AZƏRBAYCAN RESPUBLİKASININ PREZİDENTİ HEYDƏR ƏLİYEVİN ABŞ PREZİDENTİ BİLL KLİNTON İLƏ GÖRÜŞÜ
Bir-birini salamlayan və əlamətdar hadisə - faşizm üzərində Qələbənin 50 illiyi münasibətilə təbrik edən Azərbaycan və ABŞ Prezidentləri yenidən görüşmək imkanından məmnun olduqlarını bildirdilər. Dövlət başçıları əvvəlki görüşlərini və söhbətlərini xatırlayaraq bunların çox faydalı olduğunu bir daha qeyd etdilər.
Heydər Əliyev Qələbənin əldə edilməsində Azərbaycan xalqının da mühüm rolu olduğunu söyləyərək dedi ki, müharibənin gedişində dönüşün yaranmasında gecə-gündüz bilmədən çalışan Azərbaycan neftçilərinin fədakar əməyi sayəsində çıxarılan neft həlledici əhəmiyyət kəsb etmişdir.
Azərbaycan Prezidenti Dağlıq Qarabağ münaqişəsinin həlli ilə əlaqədar ATƏT-in Minsk qrupuna səfir statusu ilə özünün şəxsi nümayəndəsini təyin etmək niyyətinə görə cənab Bill Klintona minnətdarlığını bildirdi və qeyd etdi ki, bu münaqişənin sülh yolu ilə aradan qaldırılmasına Birləşmiş Ştatların maraq göstərdiyini bir daha sübut edir.
Bill Klinton bildirdi ki, Birləşmiş Ştatların siyasəti müstəqillik qazanmış dövlətlərdə demokratiyanın, insan hüquqlarının qorunmasına və bu yolla gedən ölkələrin dəstəklənməsinə yönəldilmişdir. ABŞ Prezidenti bir daha qeyd etdi ki, onun ölkəsi Ermənistan-Azərbaycan münaqişəsinə sülh yolu ilə son qoyulmasına tərəfdardır.
Prezident Heydər Əliyev bildirdi ki, münaqişə başlanandan bəri ən çox çəkən atəşkəsin bir ili mayın 12-də tam olur. Bill Klintonun fikrincə, belə uzun müddət davam edən atəşkəs böyük nailiyyətdir. Bu fikirlərlə razılaşan Heydər Əliyev dedi ki, Azərbaycan atəşkəsdən istifadə edərək böyük sülh sazişinin əldə olunmasına çalışır. Respublikamızın rəhbəri ATƏT-in Minsk qrupu çərçivəsində aparılan danışıqlar barədə ABŞ Prezidentinə ətraflı məlumat verərək dedi ki, Azərbaycan tərəfi atəşkəs rejiminin pozulması prinsipinə həmişə sadiq olmuşdur və böyük sülh sazişi bağlananadək buna sadiq qalacaqdır. Heydər Əliyev bildirdi ki, bu müharibədə Azərbaycan ilə Ermənistanın vəziyyəti eyni deyil, çünki ölkəmizin ərazisinin 20 faizi işğal edilmiş, bir milyondan çox azərbaycanlı yurd-yuvasından qaçqın düşmüşdür və hazırda çox ağır şəraitdə yaşayır. Ona görədə Heydər Əliyev Ermənistan Respublikasına və onu dəstəkləyən dövlətlərə mütləq təzyiq göstərilməsini, Ermənistanı zor işlətmək mövqeyindən çəkindirməkdə Azərbaycanın dəstəklənməsini arzulayır. Dövlətimizin başçısı həmçinin ümidvar olduğunu bildirdi ki, cənab Bill Klinton Rusiya Prezidenti cənab Boris Yeltsinlə görüşü zamanı Ermənistan-Azərbaycan münaqişəsi ətrafında da fikir mübadiləsi aparacaqdır. ABŞ Prezidenti bunu edəcəyini söylədi.
Heydər Əliyev Azərbaycanın daxili vəziyyəti, bu ilin oktyabrında ilk demokratik parlament seçkiləri keçiriləcəyi, eyni zamanda bu il respublikamızın ilk demokratik konstitusiyasının qəbul olunacağı barədə, habelə iqtisadi islahatların gedişi haqqında cənab Bill Klintona məlumat verdi. Azərbaycan Prezidenti bildirdi ki, respublikada 400-dək qəzet çıxır. 50-dək siyasi partiya fəaliyyət göstərir, qarşıdakı seçkilərdə həmin partiyaların iştirakı üçün hər cür imkan yaradılacaqdır.
Bu yaxınlarda Bakıda ABŞ səfirliyi binasının açılışı olduğunu və özünün bu mərasimdə iştirak etdiyini söyləyən Heydər Əliyev ölkələrimiz arasında münasibətlərin inkişaf etdirilməsi sahəsində Birləşmiş Ştatların Azərbaycandakı səfiri cənab Ricard Kozlariçin səmərəli fəaliyyətindən razı qaldığını və bunu yüksək qiymətləndirdiyini bildirdi.
Söhbət zamanı Prezident Heydər Əliyev Amerika şirkətləri ilə iqtisadi əlaqələrin genişləndiyini qeyd edərək dedi ki, hazırda Azərbaycanda ABŞ-ın 5 iri şirkəti fəaliyyət göstərir. O xatırlatdı ki, Azərbaycan neft konsorsiumunda iştirak payının 5 faizini bu yaxınlarda ABŞ-ın “Eksson” şirkətinə vermişdir. Cənab Bill Klinton Azərbaycanın bu addımının Birləşmiş Ştatlarda razılıqla qarşılandığını qeyd etdi. O, Azərbaycan Prezidentinin müstəqil siyasət yeritdiyindən xəbərdar olduğunu dedi və qeyd etdi ki, Ermənistan-Azərbaycan münaqişəsinin sülh yolu ilə aradan qaldırılması üçün ABŞ öz səylərini daha da gücləndirəcəkdir. Azərbaycan Prezidenti Heydər Əliyevin Ermənistan Prezidenti Levon Ter-Petrosyanla görüşündən xəbərdar olduğunu söyləyən cənab Bill Klinton dedi ki, o, bundan məmnun qalmışdır.
Bölmənin digər xəbərləri
