AZƏRBAYCAN RESPUBLİKASININ PREZİDENTİ HEYDƏR ƏLİYEVİN TÜRKİYƏYƏ RƏSMİ SƏFƏRİ
Respublika Prezidenti Heydər Əliyev səfərə yola düşməzdən əvvəl jurnalistlərə müsahibə vermişdir.
- Cənab Prezident, sizə uğurlu yol arzulayırıq. Siz hakimiyyətdə olduğunuz müddətdə üçüncü dəfədir ki, xarici ölkələrə rəsmi görüşə gedirsiniz. Azərbaycan xalqı Sizin hər bir səfərinizə böyük ümidlər bəsləyir. Qarşıdakı səfər barəsində nə deyə bilərsiniz? - sualına Prezident belə cavab vermişdir:
- Mən Türkiyəyə bu qardaş dövlətin Prezidenti hörmətli Süleyman Dəmirəlin, Türkiyə hökumətinin dəvəti ilə gedirəm. Türkiyə Azərbaycan üçün ən yaxın, qardaş və dost ölkədir. Xalqlarımız arasında böyük tarixə malik dostluq, qardaşlıq əlaqələri var. Son illər Azərbaycan müstəqillik əldə etdikdən sonra bu əlaqələr daha da möhkəmlənmişdir. Lakin görüləsi işlər də çoxdur. Güman edirəm ki, Türkiyədə olduğumuz zaman Azərbaycan ilə Türkiyə arasındakı əlaqələrin genişlənməsi, inkişaf etməsi üçün yeni işlər görüləcəkdir. Bu isə həm Azərbaycan Respublikası üçün, həm də Türkiyə Cümhuriyyəti üçün faydalı olacaqdır. Mən Türkiyəyə çox böyük məmnunluq hissi ilə yol düşürəm. Ümidvaram ki, danışıqlarımız uğurlu olacaqdır.
- Möhtərəm Prezident, Siz Ermənistanla Azərbaycan arasında münaqişənin sülh yolu ilə aradan qaldırılmasına həmişə tərəfdar olmusunuz. Üstəlik, istər Rusiyanın, istərsə də Türkiyənin vasitəçiliyinin heç vaxt əleyhinə çıxmamısınız, əksinə, buna tərəfdar olmusunuz. Qarşıdakı səfəriniz zamanı Türkiyənin vasitəçiliyi məsələsi qaldırılacaqmı? Bu məsələ yüksək səviyyədə həll ediləcəkmi?
- Şübhəsiz ki, mən bu məsələnin sülh yolu ilə, barışıq yolu ilə həll edilməsinin tərəfdarıyam. Mən bu mövqeyi indi də müdafiə edirəm. Vaxtilə ABŞ, Rusiya ilə birlikdə Türkiyə də bu məsələyə dair dəyərli bir təşəbbüs irəli sürmüşdür. Amma, təəssüflər olsun ki, indiyədək bu təşəbbüs həyata keçirilməmişdir. Odur ki, qarşıdakı görüşlər, danışıqlar zamanı həmin təşəbbüsün həyata keçirilməsi üçün imkan düşərsə bu, Azərbaycan üçün çox faydalı olacaqdır.
Təyyarə səmaya qalxaraq Türkiyəyə doğru istiqamət götürdü.
Elə həmin gün Azərbaycan Prezidenti Heydər Əliyev Ankarada Atatürk məqbərəsinə əklil qoymuş və onun xatirəsini birdəqiqəlik sükutla yad etmişdir. Prezident xatirə kitabına imza edərək bu sözləri yazmışdır: “Türk dünyasının əvəzsiz şəxsiyyəti, böyük öndər, dahi Mustafa Kamal Atatürkün məzarı önündə, onun ruhu qarşısında hörmətlə baş əyirəm. Ona Azərbaycan xalqının hədsiz məhəbbətini və ehtiramını ifadə edirəm. Unudulmaz Atatürkün müqəddəs adı, solmayan siması Türkiyə ilə Azərbaycan arasında min illərdən bəri gələn dostluğun və qardaşlığın gələcək yoluna parlaq işıq saçır”.
Daha sonra Heydər Əliyev Azərbaycan Demokratik Cümhuriyyətinin qurucularından biri olan Məmməd Əmin Rəsulzadənin məzarını ziyarət etmişdir.
Azərbaycan Respublikasının Prezidenti Heydər Əliyevin Türkiyədə rəsmi qarşılanması mərasimi Çankaya sarayında davam etdirilmişdir.
Xatırladaq ki, Azərbaycan nümayəndə heyətinin Türkiyəyə səfəri zamanı bir sıra dövlətlərarası sazişlər, o cümlədən dostluq və əməkdaşlıq haqqında müqavilə, dövlət sərhədlərinin tənzimlənməsinə dair əməli qruplar yaradılması haqqında, investisiyaların müdafiəsi barədə, kənd təsərrüfatı sahəsində elmi-texniki tərəqqi haqqında, ikiqat vergi qoyulmasının yolverilməzliyi barədə və başqa sənədlər imzalanması planlaşdırılır.
Azərbaycan Respublikasının Prezidenti Heydər Əliyev və onu müşayiət edən şəxslər Türkiyə Cümhuriyyətinin Prezidenti Süleyman Dəmirəl, Baş nazir Tansu Çillər, Türkiyə Böyük Millət Məclisinin sədri Hüsaməddin Cindoruk və ölkənin digər rəhbər xadimləri, habelə işgüzar dairələrin nümayəndələri ilə görüşəcəklər.
Bölmənin digər xəbərləri
