Bu gün təqdimatına toplaşdığımız kitab xalqımız, Azərbaycan dövlətçiliyinin inkişafı, biz ziyalılar, hər birimiz üçün, həqiqətən, son dərəcə dəyərli bir nəşrdir. Kitabı xalqımıza təqdim edən, onun ideyasını verən hörmətli professorumuz, fəlsəfə elmləri doktoru Ramiz Mehdiyev ona çox gözəl və düzgün ad qoymuşdur. Bu kitabın cildinə diqqət yetirsək, görərik ki, onun məzmunu ilə tərtibatı tam uyğun gəlir. Ümummilli liderimiz cənab Heydər Əliyev yer kürəsinin fonunda mətin addımlarla irəlilədiyi bir məqamda təsvir olunmuş və dünyanı heyran qoyan insan bu gün də mətin addımlarla öz ideyaları, qoyub getdiyi zəngin irsi ilə hər birimizin qəlbinə və dünyaya yol tapır.

Kitabda dünyanın 130-dan artıq görkəmli dövlət xadiminin, müxtəlif peşə sahiblərinin Heydər Əliyev haqqında fikirləri öz əksini tapmışdır. Bu kitabda dünyanın ən görkəmli simalarının Heydər Əliyev haqqında çox dəyərli fikirləri vardır. Mən deyərdim ki, bu kitab, bəlkə də, indiyə qədər cənab Heydər Əliyev haqqında yazılmış, deyilmiş, fikirlərin ən dəyərlilərini özündə əks etdiribdir.

Kitabda biz ilk növbədə, fəlsəfə elmləri doktoru, professor Ramiz Mehdiyevin “Əsl vətəndaş, böyük şəxsiyyət və qüdrətli lider haqqında bəzi düşüncələr” yazısı ilə qarşılaşırıq. Qeyd etməliyəm ki, bu, professor Ramiz Mehdiyevin son dövrlərdə cənab Heydər Əliyev haqqında yazdığı bir neçə əsər içərisində həqiqətən də, sanballılığı, dəyəri ilə seçilir, diqqəti cəlb edir. Bu əsərin kitaba daxil edilməsi onun strukturunu, istiqamətini müəyyənləşdirir, nəzərimizdə daha da canlandırır.

Ramiz müəllim kitabda möhtərəm Prezidentimizin şəxsiyyətini, onun vətəndaşlıq mövqeyini, siyasi lider kimi dünyada tanınmasını, Azərbaycan xalqının həyatında oynadığı çox böyük rolu gözəl təsvir etmişdir. Mən əsər haqqında çox danışmaq fikrində deyiləm. Çünki burada çıxış edənlər həmin əsərin məziyyətlərini ətraflı açdılar. Bu əsər həcmcə yığcam olmasına baxmayaraq, kitabın ümumi məzmununu özündə əks etdirir. Möhtərəm Prezidentimizin bir şəxsiyyət, siyasi lider, vətəndaş kimi mövqeyini hər bir oxucu, Heydər Əliyevin fəaliyyəti ilə maraqlanan hər bir şəxs üçün açıqlayır.

Heydər Əliyev, həqiqətən, çox qüdrətli bir şəxsiyyət olmuşdur. Elə siyasi liderlər var ki, onlar dünyanın bu əfsanəvi insanının, qüdrətli şəxsiyyətinin Azərbaycan xalqına məxsus olması barədə fikirlər söyləyib. Məsələn, Özbəkistanın Prezidenti İslam Kərimov deyəndə ki, “Azərbaycan xalqına həsəd aparıram, çünki onun dəqiq, aydın, ardıcıl siyasəti, mövqeyi olan lideri var”, əlbəttə, fəxr etməyə bilmirsən. Dünyanın görkəmli simaları Heydər Əliyevin fəaliyyətini, onun əfsanəvi bir şəxsiyyət olduğunu, dünya şöhrətli belə bir liderin Azərbaycan xalqına mənsubluğunu dönə-dönə qeyd edirlər.

Heydər Əliyev haqqında çox dəyərli fikirlər söylənilmişdir. Fikir verin, Türkiyənin tanınmış siyasi xadimlərindən biri olan, keçmiş xarici işlər naziri Ərdal İnönü Heydər Əliyev haqqında demişdir: “Heydər Əlirza oğlu həyatdakı Atatürkdür”. Bu, həqiqətən də belədir. Atatürk Türkiyənin həyatında hansı böyük rolu oynayıbsa, Heydər Əliyev də Azərbaycan xalqının həyatında çox böyük, müqəddəs bir rol oynamışdır.

Gəlin, bir anlıq XX əsrin 90-cı illərinin əvvəllərinə qayıdaq. Yəni 1993-cü ilə - cənab Heydər Əliyev ikinci dəfə hakimiyyətə gələnədək xalqımızın başına gətirilən oyunları yadımıza salaq. Həmin dövrdə Azərbaycan uçurum qarşısında idi. Onu bu uçurumdan Heydər Əliyev kimi qüdrətli şəxsiyyət xilas etdi. Həmin dövrdə bir tərəfdən “Talış-Muğan Respublikası”nın yaradılması, ikinci tərəfdən Şimaldan sadvalçıların irəli sürdükləri fikirlər, digər tərəfdən, isə Dağlıq Qarabağın və ətraf rayonların Ermənistan silahlı qüvvələri tərəfindən işğal olunması, Gəncədə, Azərbaycanın bəzi yerlərində vətəndaş müharibəsi təhlükəsinin yaranması ölkəmizi, həqiqətən, uçurum qarşısına gətirib çıxarmışdı. Heydər Əliyev həmin dövrdə bir qrup görkəmli ziyalının çağırışına, xalqın tələbinə əsasən hakimiyyətə qayıtdı. Azərbaycan xalqını, dövlətçiliyimizi məhv olmaqdan xilas etdi.

Onun sonrakı dövrlərdə dövlət quruculuğu sahəsində həyata keçirdiyi çox cahanşümul, fədakarcasına atdığı addımlar, gördüyü bütün tədbirlər Azərbaycan dövlətçiliyini artıq dünya miqyasında tanıtdırdı, xalqımıza böyük şöhrət qazandırdı.

Biz ziyalılar dünyanın görkəmli şəxsiyyətlərinin fikirlərinin bu kitaba toplanmasından qürur duyuruq. Ona görə də bu kitabın hazırlanması ideyasını irəli sürmüş professor Ramiz Mehdiyevə və işıq üzü görməsində xidməti, böyük zəhməti olmuş digər şəxslərə dərin minnətdarlığımızı bildiririk.

Azərbaycanın görkəmli simalarından biri, vaxtilə Azərbaycanda işləmiş Nikolay Baybakovun Azərbaycan haqqında və Heydər Əliyev ilə əlaqədar çox gözəl fikrini nəzərinizə çatdırmaq istəyirəm. O deyir: “Azərbaycanı və Azərbaycan xalqını Heydər Əliyev qədər sevən ikinci adam tanımıram”.

Həqiqətən də, Heydər Əliyev Azərbaycanı çox sevirdi. Təsadüfi deyil ki, o, hakimiyyətə qayıdandan sonra demişdir: “Mən həyatımın qalan hissəsini də xalqıma bağışlayıram”. Doğrudan da, biz Heydər Əliyevin fəaliyyətini məhz bu istiqamətdə qurduğunun şahidi olduq.

Kitabda ukraynalı generallardan birinin belə bir maraqlı fikri var: “Heydər Əliyev vəfat etməyib, Heydər Əliyev həlak olub”. Həqiqətən də, Heydər Əliyev vəzifə başında həlak oldu, mən deyərdim ki, şəhidlik zirvəsinə ucaldı. O, bütün həyatını Azərbaycan xalqının azadlığı uğrunda mübarizəyə həsr etdi, Azərbaycan dövlətçiliyini ən burulğanlı anlardan qurtardı, Azərbaycanı bugünkü müasir səviyyəyə çatdırdı.

Biz bu gün Azərbaycanın gələcəyi üçün narahatlıq keçirmirik. Ona görə ki, Heydər Əliyev irsinin davamçısı olan möhtərəm Prezidentimiz İlham Əliyev onun qoyduğu xətti, yolu çox diqqətlə və inamla aparır. Bilirik ki, Azərbaycanın xoşbəxt gələcəyi qarşıdadır. Bu qəbildən olan kitabların meydana çıxması və xalqa çatdırılması, başqa dillərə tərcümə olunub dünya miqyasında yayılması çox vacibdir. Çünki bu, həm Azərbaycanımızın, həm dövlətçiliyimizin, həm də Azərbaycanın başında duran, nə qədər Azərbaycan varsa, ümummilli lider kimi hamımıza şərəf gətirəcək Heydər Əliyevin fəaliyyətinin təbliği deməkdir.

Fürsətdən istifadə edib təklif edirəm ki, bu kitab başqa dillərə tərcümə olunsun. Bu fikir burada səsləndi, həqiqətən, bu kitab Əliyevşünaslığa ən dəyərli töhfədir. Heydər Əliyev haqqında çox kitablar yazılıb və bundan sonra da yazılacaqdır. Ancaq bu kitab bütövlükdə, bir siyasi lider kimi Heydər Əliyevin fəaliyyətini, şəxsiyyətini, xalqa tanıtdırmağın canlı ensiklopediyasıdır. Biz bu ensiklopediyanı dünya miqyasında təbliğ etməliyik, yaymalıyıq.

Diqqətinizə görə çox sağ olun.