Azərbaycan Silahlı Qüvvələri Qarabağdakı qanunsuz erməni hərbi birləşmələrini müasir silahlarla məhv etdi – ŞƏRH
Bakı, 23 sentyabr, AZƏRTAC
Qırx dörd günlük Vətən müharibəsindən sonra kapitulyasiya etmiş Ermənistan üzərinə götürdüyü öhdəlikləri yerinə yetirməkdən boyun qaçırırdı. Ermənistanın baş naziri Nikol Paşinyan Azərbaycanın ərazi bütövlüyünü, Qarabağın Azərbaycanın tərkib hissəsi olduğunu bəyan etsə də, iki ölkə arasında sülh müqaviləsinin imzalanmasını, sərhədlərinin delimitasiyasını müxtəlif bəhanələrlə yubadırdı. Hətta səbatsızlıq göstərərək o, qondarma xunta rejimini “ildönümü” münasibətilə təbrik də etdi.
Bunu AZƏRTAC-a açıqlamasında ehtiyatda olan mayor, Qarabağ müharibəsi veteranı, hərbi ekspert Əbülfət Məhərrəmli deyib.
Hərbi ekspert bildirib ki, 2020-ci il 10 noyabr tarixli üçtərəfli Bəyanatda əksini tapmasına baxmayaraq, Ermənistan Qarabağdan 10 min nəfərlik hərbi qüvvələrini çıxarmaqdan imtina edir, gizli yollarla Xankəndiyə silah-sursat göndərir, təxribatlar törədirdi. Azərbaycan tərəfindən dəfələrlə xəbərdarlıq edilməsinə baxmayaraq, ermənilər öz əməllərindən qalmır, hətta Beynəlxalq Qırmızı Xaç Komitəsini də öz çirkin məqsədləri üçün istifadə edirdilər. Bu səbəbdən Azərbaycan Laçın sərhəd-keçid məntəqəsini bağladıqdan, Ağdam-Xankəndi yolunu yükdaşımaları üçün təklif etdikdən sonra beynəlxalq dəstək qazanmaq üçün şoular təşkil etməyə başladılar. Həmçinin Azərbaycanın hava məkanında uçuşlar yerinə yetirən sərnişin təyyarələrinin GPS naviqasiya sistemlərinə qarşı qeyri-qanuni erməni silahlı dəstələri növbəti dəfə radiomaneələr tətbiq edirdilər.
“Yollara diversiya-təxribat qruplarının minalar basdırması, günahsız insanlara qarşı sentyabrın 19-da terror aktlarının törədilməsi, Ordumuzun mövqelərinin atəşə tutulması ölkəmizin rəhbərliyinin səbir kasasını növbəti dəfə daşırdı. Silahlı Qüvvələrimiz Azərbaycanın konstitusiya quruluşunun bərpa edilməsi məqsədilə Qarabağda lokal xarakterli antiterror tədbirlərinə başladı.
Eyni zamanda, insan haqlarını müdafiə adı ilə, əslində isə ərazi bütövlüyümüzə təhdid yaradan məkrli qüvvələrə havadarlıq edən bir sıra dövlət və lobbi təşkilatları döyüşlər zamanı hay-küy qoparmışdılar. Bütün bunlara baxmayaraq, Azərbaycan rəhbərliyi dövlət maraqlarını əsas gətirərək və bütün müvafiq beynəlxalq humanitar konvensiyalara riayət etməklə Ordumuzun arsenalındakı ən müasir silahlardan və hədəfləri dəqiqliklə məhv edən texnologiyalardan istifadə etməklə Qarabağdakı qeyri-qanuni erməni hərbi birləşmələrinə qarşı amansız mübarizə aparırdı”, - deyə ehtiyatda olan mayor vurğulayıb.
Ə.Məhərrəmli xatırladıb ki, legitim hərbi hədəfləri məhv edən qoşunlarımız döyüşlər zamanı mülki əhaliyə xətər yetirmədi. Çünki qanunsuz hərbi birləşmələrin bəzi mövqeləri ermənilərin yaşayış məntəqələrinə yaxın olduğundan Müdafiə Nazirliyi xüsusi vasitələrlə dinc sakinlərə müraciət edərək onları hərbi hədəflərdən kənar dayanmağa çağırdı. Nəticədə bu döyüşlərdə dinc erməni sakinləri zərər görmədi. Hətta Ermənistanın baş naziri Nikol Paşinyanın da etiraf etdiyi kimi, “mülki şəxslərə zərər dəyməyib”.
Bir sutka keçməmiş, yəni sentyabrın 20-də saat 13:00 radələrində xunta rejimi ordumuzun gücünü bir daha hiss etdikdən sonra Azərbaycan rəhbərliyinin irəli sürdüyü şərtləri qəbul etməyə, o cümlədən Ermənistan ordusunun birləşmələri, eləcə də qeyri-qanuni erməni dəstələr silahı yerə qoymağa məcbur oldular.
“Döyüşlər nəticəsində düşmənin hərbi birləşmələrinin 90-dan çox döyüş mövqeyi, eləcə də bir neçə strateji əhəmiyyətli nöqtələri qısa müddətdə Azərbaycan Ordusunun nəzarəti altına keçdi, xeyli silah və texnikası qənimət kimi götürüldü.
Azərbaycan bir daha həm dostlarına, həm də əleyhdarlarına dövlətimizin maraqlarının hər şeydən üstün tutulduğunu, ordumuzun gücünü nümayiş etdirdi”, - deyə Qarabağ müharibəsi veteranı fikrini yekunlaşdırıb.
Bölmənin digər xəbərləri
