AZƏRBAYCAN TAEKVONDOÇULARI DÜNYA ÇEMPİONATINDA İŞTİRAK EDƏCƏKLƏR
Bakı, 7 oktyabr (AZƏRTAC). Oktyabrın 14-19-da Kopenhagendə taekvondo üzrə dünya çempionatı keçiriləcəkdir. Azərbaycan yığmasının məşqçiləri Danimarkaya gedəcək taekvondoçuları müəyyən etmişlər. Kişilər arasında ölkəmizi Samir Aydınov (54 kq), Elnur Amanov ( 58 kq), Fariz Əliyev (63 kq), İlkin Şahbazov (68 kq), Ramil Əzizov (74 kq), Rəşad Əhmədov (80 kq), Təvəkkül Bayramov (87 kq) və Vuqar Məcidov (87 kq-dan yuxarı) təmsil edəcəklər. Qadınlar arasında çempion titulu uğrunda Xəyalə Quliyeva (47 kq), Aygül Abdullayeva (51 kq) , Arzu Bahirova (55 kq) və koreyalı legioner Seunqmi Li (59 kq ) yarışacaqlar. Azərbaycan nümayəndə heyətinin rəhbəri Taekvondo Federasiyasının vitse-prezidenti Füzuli Musayev olacaqdır. Yığmanı baş məşqçi Con Con De, məşqçilər Niyamməddin Paşayev, Ələkbər İmaməliyev, Gündüz Abdullayev və Səbuhi Zulfüqarov müşayiət edəcəklər.
Çempionatda 140 ölkədən idmançıların iştirakı gözlənilir.
Bölmənin digər xəbərləri
