Azərbaycan Texniki Universitetində Xocalı soyqırımı qurbanlarının xatirəsi anılmışdır
Bakı, 24 fevral (AZƏRTAC). Fevralın 24-də Azərbaycan Texniki Universitetində (AzTU) Xocalı soyqırımının 22-ci ildönümünü ilə bağlı faciə qurbanlarının x atirəsini anma mərasimi keçirilmişdir.
Tədbir iştirakçıları əvvəlcə Xocalı faciəsi qurbanlarının xatirəsini bir dəqiqəlik sükutla yad etmişlər.
AzTU-nun mətbuat xidmətindən AZƏRTAC-a bildirmişlər ki, mərasimi universitetin rektoru, professor Havar Məmmədov açaraq Xocalı faciəsinin Azərbaycan tarixinin ən qanlı səhifələrindən biri olduğunu söyləmişdir. Qeyd etmişdir ki, xalqımıza qarşı törədilmiş bu ağır cinayətə və soyqırımı hadisəsinə keçmiş respublika rəhbərliyi obyektiv qiymət verməmiş, prinsipiallıq göstərməmiş, əsl həqiqəti Azərbaycan xalqından və beynəlxalq ictimaiyyətdən gizlətmişdir. Məhz ümummilli lider Heydər Əliyevin xalqın təkidli tələbi ilə hakimiyyətə gəlişindən sonra bu faciəyə hüquqi qiymət verilmişdir.
Bildirilmişdir ki, Azərbaycan Prezidenti İlham Əliyevin yeritdiyi düzgün siyasət nəticəsində Xocalı faciəsi barədə əsl həqiqətlər dünya ictimaiyyətinə olduğu kimi çatdırılmışdır. Bu istiqamətdə fəaliyyət hazırda ölkəmizin diplomatik nümayəndəlikləri, xaricdəki diaspor təşkilatlarımız vasitəsilə daha da genişlənmişdir. Təsadüfi deyildir ki, ABŞ-ın 15 ştatı, dünyanın 8 dövləti, İslam Əməkdaşlıq Təşkilatına daxil olan 53 ölkə Xocalı faciəsini soyqırımı faktı kimi təsdiqləmişdir. Üç ölkədə Xocalı soyqırımı qurbanlarının xatirəsinə abidələr ucaldılmışdır.
Mərasimdə qeyd olunmuşdur ki, Dağlıq Qarabağda ermənilərin yerli azərbaycanlı əhaliyə qarşı təcavüzü, düşmənçiliyi onilliklər boyu davam etmişdir. Xocalı hadisəsinə qədər erməni silahlı quldurları Dağlıq Qarabağın Kərkicahan, Qaradağlı, Meşəli kəndlərində və digər yerlərdə burada yaşayan azərbaycanlılara ardı-arası kəsilməyən təcavüzləri ilə işgəncələr vermiş, dinc əhalini, günahsız insanları qətlə yetirmişlər. Dağlıq Qarabağdan yerli azərbaycanlı əhali planauyğun sıxışdırılaraq silahlı təcavüz nəticəsində çıxarıldıqdan sonra, bu azmış kimi Azərbaycanın ətrafdakı 7 rayonu da Ermənistan hərbiçiləri tərəfindən işğal edilmişdir.
Tədbirdə Milli Məclisin deputatı, Xocalı faciəsinə qədər Xankəndində yaşamış və pedaqoq kimi fəaliyyət göstərmiş Flora Qasımova, Dağlıq Qarabağın erməni millətindən olan rəhbərlərinin vilayətdə yaşayan azərbaycanlılara qarşı diskriminasiya siyasəti yeritdiklərinin şahidi olduğunu vurğulamışdır. Bu siyasət milliyyətcə azərbaycanlı olan yerli əhalinin bütün təbəqələrinə tətbiq edilmişdir. Onların Konstitusiyamızda təsbit olunmuş bütün vətəndaşlıq hüquqları açıq-aydın tapdalanmışdır.
Milli Məclisin deputatı, həmçinin qatı erməni millətçilərinin Xocalı ilə yanaşı, Dağlıq Qarabağın digər şəhər və kəndlərində də sayı-hesabı bilinməyən ağlasığmaz cinayətlərindən söz açmışdır. O, təəssüflə bildirmişdir ki, bu hadisələrdən xəbər tutan Azərbaycanın hakimiyyətdə olan keçmiş rəhbərliyi ermənilərin xalqımıza qarşı planlı surətdə həyata keçirdikləri belə cinayətləri dayandırmaq üçün lazımi tədbirlər görməmişdir. Nəticədə azərbaycanlılara qarşı ardı-arası kəsilməyən terror hadisələri getdikcə geniş miqyas almış, bu bölgənin azərbaycanlı əhalisi zorakılıq və işgəncə yolu ilə doğma yurd-yuvalarından tədricən didərgin salınmışdır.
Anma mərasimində Milli Məclisin deputatı, kafedra müdiri, professor Astan Şahverdiyev və Xocalı faciəsinin canlı şahidi, bu hadisələrə qədər həmin şəhərdə yaşamış Sakit Məmmədov ermənilərin azərbaycanlı əhaliyə qarşı düşmənçilik mövqeyini faktlarla yada salmışlar. Onlar son 200 il ərzində xarici ölkələrdən gələrək yerli əhaliyə qarşı xəyanətləri, çirkin əməlləri, haqsızlıqları əks etdirən bir sıra faktları açıqlamışlar.
Mərasimdə qeyd edilmişdir ki, tələbələr, bugünkü gənclik tarix boyu erməni millətçilərinin xalqımıza qarşı törətdikləri ağır cinayətləri unutmamalı, vətənpərvər olmalı, işğal olunmuş torpaqlarımızın azad edilməsinə, bacarıqlı mütəxəssis kimi yetişib Azərbaycanın sürətlə inkişaf etməkdə olan iqtisadiyyatına öz töhfələrini verməlidirlər.
Tədbir universitet tələbələrinin hazırladıqları Xocalı soyqırımı qurbanlarının xatirəsinə həsr edilmiş ədəbi-bədii kompozisiya ilə başa çatmışdır.
Bölmənin digər xəbərləri
