AZƏRBAYCAN VƏ İRLANDİYA ARASINDA İKİTƏRƏFLİ ƏLAQƏLƏRİN GENİŞLƏNDİRİLMƏSİ MƏSƏLƏLƏRİ MÜZAKİRƏ OLUNMUŞDUR
AZƏRTAC xəbər verir ki, Azərbaycanın Böyük Britaniyadakı səfiri Fəxrəddin Qurbanov İrlandiyaya işgüzar səfəri zamanı keçirdiyi görüşlərdə ikitərəfli əlaqələrin dərinləşdirilməsi istiqamətində geniş fikir mübadiləsi aparmışdır.
Səfir İrlandiya Xarici İşlər Nazirliyinin Rusiya, Şərqi Avropa və Mərkəzi Asiya Departamentinin direktoru xanım Katerin Koll, nazirliyin Avropa İttifaqı bölməsinin rəhbəri xanım Şila Maquir, ölkənin Avropa İttifaqındakı enerji məsələləri üzrə nümayəndəsi ilə, eləcə də İrlandiya parlamentində görüşlər keçirmişdir.
Görüşlərdə F.Qurbanov Ermənistan-Azərbaycan, Dağlıq Qarabağ münaqişəsi, onun həlli istiqamətində davam etdirilən sülh danışıqları, ölkəmizdə və ümumilikdə regionda gedən siyasi proseslər, həyata keçirilmiş layihələr, respublikamızda yaradılmış əlverişli investisiya mühiti barədə ətraflı məlumat vermişdir.
Görüşlərdə Azərbaycanın və İrlandiyanın xarici siyasət qurumları, eləcə də parlamentləri arasında əlaqələrin yaradılması imkanları müzakirə olunmuş və bu istiqamətdə qarşılıqlı səfərlərin təşkilinin, həmçinin hər iki ölkədə parlamentlərarası dostluq qruplarının yaradılmasının əlaqələrin genişləndirilməsinə töhfə verəcəyi vurğulanmışdır.
Bölmənin digər xəbərləri
