Azərbaycanda kənd təsərrüfatının gələcək inkişafı üçün geniş imkanlar mövcuddur ŞƏRH
Bakı, 1 iyun, AZƏRTAC
Kənd təsərrüfatı Azərbaycanın qeyri-neft sektorunun ən mühüm istiqamətlərindən biridir və bu sahənin inkişafı dövlət siyasətinin əsas prioritetləri sırasında yer alır. Son illərdə həyata keçirilən məqsədyönlü tədbirlər, qəbul olunan dövlət proqramları və fermerlərə göstərilən dəstək aqrar sektorun davamlı inkişafına mühüm töhfə verib. Xüsusilə regionların sosial-iqtisadi inkişafına dair dövlət proqramlarının icrası kənd təsərrüfatı üçün zəruri infrastrukturun yaradılmasına, istehsal imkanlarının genişlənməsinə və kənd yerlərində məşğulluğun artırılmasına şərait yaradıb.
Bu sözləri AZƏRTAC-a açıqlamasında Milli Məclisin Əmək və sosial siyasət komitəsinin sədri Musa Quliyev deyib.
O qeyd edib ki, Azərbaycanda kənd təsərrüfatı məhsullarının böyük hissəsi daxili bazarın tələbatını ödəyir, eyni zamanda, bir sıra məhsullar xarici ölkələrə ixrac olunur. Dövlət tərəfindən fermerlərə müxtəlif subsidiyalar ayrılır, onlar torpaq vergisi istisna olmaqla digər vergilərdən azad edilir və fəaliyyətlərini genişləndirmək üçün əlverişli imkanlarla təmin olunurlar. Məhsulların saxlanılması, daşınması və ixracı istiqamətində soyuducu anbarların yaradılması, logistika xidmətlərinin təşkili və digər dəstək mexanizmləri kənd təsərrüfatının səmərəliliyini artırır.
Deputat ölkə əhalisinin əhəmiyyətli hissəsinin kənd yerlərində yaşamasının və aqrar sektorda çalışmasının kənd təsərrüfatının sosial əhəmiyyətini daha da artırdığına diqqət çəkib. O bildirib ki, bu sahə minlərlə insan üçün gəlir mənbəyi olmaqla yanaşı, yeni iş yerlərinin yaradılması baxımından da böyük potensiala malikdir. Kənd təsərrüfatının inkişafı regionlarda iqtisadi fəallığın yüksəlməsinə, əhalinin rifahının yaxşılaşmasına və daxili miqrasiyanın azalmasına müsbət təsir göstərir.
“Qarabağ və Şərqi Zəngəzurun işğaldan azad olunması Azərbaycanın kənd təsərrüfatı imkanlarını daha da genişləndirib. Həmin ərazilərdə əkinçilik, bağçılıq, heyvandarlıq və digər kənd təsərrüfatı sahələrinin bərpası istiqamətində həyata keçirilən tədbirlər artıq öz nəticələrini verməyə başlayıb. Bu torpaqların aqrar dövriyyəyə cəlb olunması həm istehsalın artmasına, həm də ölkənin iqtisadi potensialının güclənməsinə xidmət edir.
Kənd təsərrüfatının inkişafında aqroturizmin rolu da getdikcə artır. Belə ki, kənd yerlərində turizm fəaliyyətinin genişlənməsi yerli əhalinin gəlirlərinin artmasına və regionların daha sürətli inkişafına şərait yaradır. Bununla yanaşı, heyvandarlıq və bitkiçilik sahələrində məhsuldarlığın yüksəldilməsi məqsədilə yeni texnologiyalar tətbiq olunur, yüksək məhsuldar bitki sortlarının və heyvan cinslərinin yetişdirilməsi istiqamətində mühüm layihələr həyata keçirilir. Aqrar sektorun inkişafına təsir göstərən əsas amillərdən biri də su təminatının yaxşılaşdırılması və suvarma sistemlərinin müasirləşdirilməsidir. Son illərdə yeni su anbarlarının tikilməsi, mövcud infrastrukturun yenilənməsi və su ehtiyatlarından səmərəli istifadənin təşviqi kənd təsərrüfatının dayanıqlı inkişafına mühüm töhfə verir. Bu tədbirlər fermerlərin fəaliyyətini daha səmərəli planlaşdırmasına və məhsuldarlığın artırılmasına imkan yaradır”, - deyə deputat qeyd edib.
Musa Quliyev vurğulayıb ki, bütün bu addımlar Azərbaycanda kənd təsərrüfatının gələcək inkişafı üçün geniş imkanların mövcud olduğunu göstərir. Aqrar sektor ölkənin ərzaq təhlükəsizliyinin təmin olunmasında mühüm rol oynayır, əhalinin keyfiyyətli ərzaq məhsulları ilə təminatına xidmət edir və qeyri-neft iqtisadiyyatının aparıcı sahələrindən biri kimi strateji əhəmiyyət daşıyır.
Bölmənin digər xəbərləri
