Mərasimdən əvvəl Prokurorluğun şəxsi heyəti Şəhidlər xiyabanına gedərək, Azərbaycanın azadlığı, müstəqilliyi və ərazi bütövlüyü uğrunda canlarını qurban vermiş vətən oğullarının xatirəsini yad etdi. Respublikanın Baş prokuroru Zakir Qaralov “Əbədi məşəl” abidəsi önünə əklil qoydu.

Respublika Prokurorluğunda keçirilən mərasim Azərbaycanın dövlət himninin səsləndirilməsi ilə başladı. Salona toplaşanlar xalqımızın ümummilli lideri Heydər Əliyevin xatirəsini bir dəqiqəlik sükutla yad etdilər.

Mərasimdə çıxış edən Baş prokuror Zakir Qaralov prokurorluq orqanlarının əməkdaşlarını peşə bayramı münasibətilə təbrik edərək vurğuladı ki, bu sevinci bizə müstəqil Azərbaycan dövlətinin qurucusu, xalqımızın ümummilli lideri Heydər Əliyev bəxş etmişdir. O, prokurorluq işçilərinin peşə bayramı günü ərəfəsində Azərbaycan Prezidenti İlham Əliyevin əməkdaşların bir qrupunu yüksək dövlət mükafatlarına və ali xüsusi rütbələrə layiq görməsini prokurorluğa dövlət səviyyəsində göstərilən etimadın təzahürü və prokurorluq işçilərinin fəaliyyətinə verilən yüksək qiymət kimi səciyyələndirdi. Baş prokuror kollektiv adından Prezidentə minnətdarlığını bildirərək dedi ki, prokurorluq işçiləri onlara göstərilən etimadı doğrultmaq üçün səylərini əsirgəməyəcəklər.

Natiq son bir ildə respublikamızın ictimai-siyasi həyatında mühüm hadisələrin baş verdiyini, vətəndaş cəmiyyəti formalaşdırılması istiqamətində müsbət nəticələrin əldə edildiyini xatırlatdı, sonuncu prezident seçkilərini xüsusi vurğulayaraq dedi ki, demokratik şəraitdə keçirilən bu seçkilərdə, 1993 və 1998-ci illərdə olduğu kimi, yeganə düzgün seçimini edən Azərbaycan xalqı ölkəmizin inkişafını, müstəqilliyimizin əbədiliyini təmin edən siyasətə səs vermişdir. Z.Qaralov Heydər Əliyev siyasi xəttinin layiqli davamçısı olan Prezident İlham Əliyevin rəhbərliyi altında respublikamızın sosial-iqtisadi inkişafı, əhalinin həyat şəraitinin qabaqcıl ölkələr səviyyəsinə qaldırılması, demokratik dəyərlərin tam şəkildə reallaşması və dünya birliyinə hərtərəfli inteqrasiyası, ən əsası isə, doğma torpaqlarımızın erməni işğalından azad edilməsi istiqamətində müəyyənləşdirilmiş strateji xəttə uyğun olaraq məqsədyönlü tədbirlərin həyata keçirildiyini vurğuladı.

Eyni zamanda, prokurorluğun dövlət təsisatı kimi daha da təkmilləşdirilməsi istiqamətində həyata keçirilən tədbirlərdən danışdı, bu sırada Prezident İlham Əliyevin imzaladığı “Korrupsiyaya qarşı mübarizə haqqında Azərbaycan Respublikası Qanununun tətbiq edilməsi barədə” Sərəncamının xüsusi əhəmiyyət kəsb etdiyini bildirdi. O dedi ki, Sərəncamın tələblərinə müvafiq olaraq, Baş prokurorun yanında Korrupsiyaya qarşı mübarizə idarəsinin yaradılması haqqında göstərişin verilməsi, ilk növbədə, prokurorluq orqanlarına dövlət səviyyəsində göstərilən inamla yanaşı, prokurorluğun strukturunun daha da təkmilləşməsinə yönəldilmiş mühüm bir addımdır.

Z.Qaralov bildirdi ki, Azərbaycan Milli Prokurorluğunun yaradılmasının 86-cı ildönümünü qeyd edən prokurorluq orqanları xalqımızın öz müstəqilliyi uğrunda apardığı mübarizənin tarixi ilə bərabər çətin və mürəkkəb, eyni zamanda, şərəfli inkişaf yolu keçərək, hansı şəraitdə fəaliyyət göstərməsindən asılı olmayaraq, son nəticədə millətinə və dövlətçilik ideyalarına sədaqətlə qulluq etmiş, qanunçuluğun möhkəmləndirilməsi və cinayətkarlığa qarşı mübarizədə öz xidmətlərini göstərmişdir.

Baş prokuror 2000-ci ildə Prezident Heydər Əliyevin prokurorluq orqanlarının rəhbər işçiləri ilə keçirdiyi müşavirədə bu orqanlarda yaranmış qeyri-sağlam mühit, vəzifədən sui-istifadə hallarına və istintaq zamanı ədalətsiz hərəkətlərə yol verilməsi, şəxsi məqsədlər naminə qanunlar pozulmaqla cinayətkarlara havadarlıq edilməsi, özəl sektorun inkişafı yolunda ciddi maneə olan qanunsuz yoxlamaların keçirilməsi kimi mənfi hallar kəskin tənqid edilməklə, onların aradan qaldırılması üçün qısa müddət ərzində ən qəti tədbirlərin görülməsini prokurorluğun yeni rəhbərliyinin qarşısında vəzifə kimi qoyduğunu xatırlatdı. O dedi ki, ölkəmizdə aparılan yenidənqurma prosesindən kənarda qalan Azərbaycan Prokurorluğunda məhz bu müşavirədən sonra hərtərəfli islahatlara təkan verildi. Ölkəmizdəki məhkəmə-hüquq islahatları çərçivəsində prokurorluqda görülməsi vacib olan işlərin əsas istiqamətləri müəyyənləşdirildi. Bununla əlaqədar dövlət başçısının imzaladığı bir sıra Fərman və Sərəncamların prokurorluğun formalaşdırılması üçün zəruri qanunvericilik əsaslarının yaradılmasında xüsusi rolu oldu.

Prokurorluqda kadr işinin daha da təkmilləşdirilməsi istiqamətində görülən tədbirlərdən söhbət açan natiq əməkdaşların peşə hazırlığının artırılması üçün müasir tələblərə cavab verən Tədris Mərkəzinin formalaşdırılmasını, kadrlara qarşı tələbkarlığın artırılması, icra və əmək intizamının daha da möhkəmləndirilməsi sahəsində görülən işləri vurğuladı.

Baş prokuror cinayətkarlığa və hüquq pozuntularına qarşı mübarizənin kəsərliliyinin daha da artırılmasının, daxili işlər və milli təhlükəsizlik nazirlikləri ilə sağlam və işgüzar münasibətlər əsasında qurulmuş qarşılıqlı əlaqələrin gücləndirilməsinin nəticəsi olaraq, hazırda ölkədə kriminogen durumun tam nəzarətdə olduğunu, mütəşəkkil cinayətkarlığa qarşı birgə mübarizənin sayəsində qatı cinayətkar dəstələrin zərərsizləşdirildiyini bildirdi. Eyni zamanda, “Prokurorluq haqqında” qanunla müəyyənləşdirilmiş fəaliyyət istiqamətləri üzrə prokurorluğun işinin səmərəliliyi və keyfiyyətinin daha da yüksəldilməsi, o cümlədən qanunun aliliyi və insan hüquqlarının daha etibarlı müdafiəsi istiqamətində zəruri tədbirlərin görüldüyünü söylədi.

Z.Qaralov əminliklə vurğuladı ki, xalqımızın ümummilli lideri Heydər Əliyevin dövlətçilik siyasəti nəticəsində demokratik bir qurum kimi formalaşmış Azərbaycan Prokurorluğu öz fəaliyyətini dövrün tələbləri səviyyəsində qurmaqla, Prezident İlham Əliyevin rəhbərliyi ilə respublikamızın demokratik dəyərlər əsasında hərtərəfli inkişafına istiqamətləndirilmiş dövlətçilik tədbirlərinin həyata keçirilməsində yaxından iştirak edəcəkdir.

Sonra Prokurorluq orqanlarının veteranları, ali xüsusi rütbələrə layiq görülmüş və yüksək dövlət mükafatları ilə təltif olunmuş əməkdaşları çıxış edərək, ölkə rəhbərliyinə dərin minnətdarlıqlarını bildirdilər.

Mərasimdə Prokurorluğun mərkəzi aparatının bir qrup əməkdaşına vaxtından əvvəl rütbə, fəxri fərmanlar və hədiyyələr təqdim olundu.