Azərbaycanda Rusiya mədəniyyəti günlərinin iştirakçıları aprelin 23-də səhər Şəhidlər xiyabanına gələrək ölkəmizin azadlığı, müstəqilliyi və ərazi bütövlüyü uğrunda həlak olmuş mərd mübarizlərin xatirəsini ehtiramla yad etdilər. Şəhidlərin məzarları üzərinə tər çiçəklər, “Əbədi məşəl” abidəsinin önünə əklil qoydular. Əklilin üzərində bu sözlər yazılmışdı: “Şəhidlərin əziz xatirəsinə. Azərbaycanda Rusiya mədəniyyəti günlərinin iştirakçıları adından”. 

Əklilqoyma mərasimində Rusiyanın mədəniyyət naziri Mixail Şvıdkoy və Azərbaycanın mədəniyyət naziri Polad Bülbüloğlu iştirak edirdilər.

X x x

Sonra Rüstəm Mustafayev adına Azərbaycan Dövlət İncəsənət Muzeyində “XVIII-XX əsrlər rus incəsənəti” sərgisinin açılışı oldu. Sərgidə Rusiyanın Dövlət Keramika Muzeyinin, “XVIII əsr Kuskovo malikanəsi” muzeyinin və Tver şəkil qalereyasının kolleksiyalarından 300-ə qədər eksponat nümunəsi nümayiş etdirilir. Rəngkarlıq, qrafika, dekorativ-tətbiqi sənət əsərlərindən ibarət bu sərgi tamaşaçılarda son üç əsrdə Rusiya incəsənətinin inkişaf tarixi barədə geniş təəssürat yaradır.

Sərgini Azərbaycan Dövlət İncəsənət Muzeyinin direktoru, respublikanın xalq rəssamı İbrahim Zeynalov açdı. Açılış mərasimində Azərbaycanın mədəniyyət naziri Polad Bülbüloğlu, Rusiyanın mədəniyyət naziri Mixail Şvıdkoy, respublika Rəssamlar İttifaqının sədri Fərhad Xəlilov çıxış edərək, Azərbaycan-Rusiya mədəni əlaqələrini inkişaf etdirməyin əhəmiyyətindən danışdılar, bunun üçün geniş imkanlar yarandığını bildirdilər.

Açılış mərasimində Rusiya Federasiyasının Azərbaycandakı səfiri Nikolay Ryabov iştirak edirdi.

X x x

Daha sonra Rusiya mədəniyyəti günlərinin iştirakçıları Azərbaycan mədəniyyətinin görkəmli xadimlərindən Üzeyir Hacıbəyovun, Bülbülün, Natəvanın hazırda İncəsənət muzeyinin həyətində saxlanılan, Şuşa işğal edilərkən erməni silahlı qüvvələri tərəfindən “güllələnmiş” abidələrinə baxdılar. Qonaqlara erməni millətçilərinin işğal etdikləri ərazilərimizdə xalqımızın maddi və mədəniyyət abidələrini məhv etmələri barədə ətraflı məlumat verildi.

X X X

Aprelin 23-də Azərbaycan Yazıçılar Birliyində ölkəmizdə Rusiya Federasiyası mədəniyyəti günləri çərçivəsində Rusiya şairləri Aleksey Alyoxin, Tatyana Bek və Maksim Amelinlə görüş keçirilmişdir.

Yazıçılar Birliyinin sədri, Milli Məclisin deputatı Anar qonaqları salamladı və Azərbaycan ədəbiyyatının bugünkü vəziyyətindən danışaraq dedi ki, bu yaradıçılıq təşkilatının dörd nəşrindən biri də rus dilində çıxır. O, Azərbaycanın müstəqillik qazandıqdan sonra qarşılaşdığı problemlərdən söz açaraq bildirdi ki, bunlar keçmiş SSRİ-nin digər respublikalarında olduğu kimidir. Lakin ölkəmizin başlıca problemi Ermənistan-Azərbaycan münaqişəsidir. Ermənistanın təcavüzü nəticəsində Azərbaycan ərazilərinin 20 faizi işğal edilmiş və bir milyon nəfərədək vətəndaşımız qaçqın-köçkünə çevrilmişdir. Hələ Qriboyedov yazırdı ki, İrandan ermənilərin Azərbaycana köçürülməsi münaqişəyə gətirib çıxaracaqdır.

Rusiya nümayəndə heyətinin üzvləri ölkələrimizin yaradıcı xadimləri arasında əlaqələri dərinləşdirməyin və genişləndirməyin vacibliyini vurğulayaraq bildirdilər ki, artıq ənənəyə çevrilmiş mədəniyyət günləri bu prosesdə xüsusi rol oynamalıdır.

X x x

Həmin gün Kinematoqrafçılar İttifaqında Rusiya və Azərbaycanın kino xadimlərinin görüşü oldu.

Səmimilik şəraitində keçən görüşdə Azərbaycan Kinematoqrafçılar İttifaqının birinci katibi, xalq artisti Rasim Balayev, kinorejissor, xalq artisti Eldar Quliyev qonaqlara Azərbaycan kino sənətinin vəziyyəti və perspektivləri barədə ətraflı məlumat verdilər.

Rusiya və Azərbaycanın kino xadimləri keçmiş ənənələr əsasında əməkdaşlığı genişləndirməyin vacibliyini xüsusi vurğuladılar.

X x x

Aprelin 23-də M.F.Axundov adına Azərbaycan Dövlət Kitabxanasında Azərbaycan və Rusiya şahmatçılarının dostluq turniri keçirildi. Turnir başlanmazdan əvvəl Azərbaycanın`mədəniyyət naziri Polad Bülbüloğlu çıxış edərək, iştirakçıları təbrik etdi. Nazir vurğuladı ki, kimin qalib gəlməsindən asılı olmayaraq, bu turnir xalqlarımız arasında dostluğun və mehriban qonşuluq əlaqələrinin daha da möhkəmlənməsinə öz töhfəsini verəcəkdir.

Azərbaycan Şahmat Federasiyasının vitse-prezidenti Faiq Həsənov bildirdi ki, respublikamızda Rusiya mədəniyyəti günləri çərçivəsində aprelin 24-də Respublika şahmat mərkəzində ölkələrimizin şahmatçıları arasında daha bir görüş keçiriləcəkdir.

Turnirdə 10 şahmatçı, hər ölkədən beş idmançı iştirak edirdi.

Kitabxananın foyesində ölkəmizdə Rusiya Federasiyası mədəniyyəti günlərinə həsr olunmuş və Rusiya Prezidenti Vladimir Putinin Azərbaycan Respublikasına rəsmi səfərini, Azərbaycan Prezidenti Heydər Əliyevin Rusiyayaya dövlət səfərini, habelə Moskvanın və bütün Rusiyanın Patriarxı II Aleksinin respublikamıza səfərini, dünya şöhrətli musiqiçi Mstislav Rostropoviçin Bakıda keçirdiyi günləri əks etdirən bədii-publisistik kompozisiya açılmışdır.

X X X

Aprelin 23-də “Respublika” sarayında P.İ.Çaykovski adına Dövlət Akademik Böyük Simfonik Orkestrinin görkəmli Azərbaycan dirijoru, SSRİ xalq artisti, Sosialist Əməyi Qəhrəmanı, SSRİ Dövlət mükafatı laureatı, C.Nehru adına beynəlxalq mükafat laureatı maestro Niyazinin xatirəsinə həsr edilmiş konserti olmuşdur.

Konsertdən əvvəl Azərbaycanın mədəniyyət naziri Polad Bülbüloğlu, P.İ.Çaykovski adına Dövlət Akademik Böyük Simfonik Orkestrin bədii rəhbəri və dirijoru Vladimir Fedoseyev çıxış edərək, Rusiya mədəniyyəti günləri çərçivəsində verilən bu konsertin ölkələrimiz arasında mədəni və dostluq əlaqələrinin daha da möhkəmlənməsinə xidmət göstərdiyini, gələcəkdə belə qarşılıqlı tədbirlərin davam etdiriləcəyini vurğuladılar. Onlar maestro Niyazinin yaradıcılığından, bu məşhur orkestrlə əməkdaşlığından danışdılar. Bildirildi ki, bu il görkəmli dirijorun anadan olmasının 90 illiyi tamam olur və bu münasibətlə bir sıra tədbirlər keçiriləcəkdir.

P.İ.Çaykovski adına Dövlət Akademik Böyük Simfonik Orkestri Vladimir Fedoseyevin idarəsi ilə Niyazinin “Rast” simfonik muğamını, “Romeo və Cülyetta” simfonik uvertürasını ifa etdi. Salona toplaşanlar Rusiya musiqiçilərinin yüksək ustalığını alqışlarla qarşıladılar.

Milli Məclis sədrinin birinci müavini Arif Rəhimzadə və digər rəsmi şəxslər konsertdə olmuşlar.

X X X

X X X

Azərbaycanda Rusiya Federasiyası mədəniyyəti günləri çərçivəsində aprelin 23-də kamera və orqan musiqisi salonunda beynəlxalq müsabiqələr laureatı Lada Labzinanın iştirakı ilə orqan musiqisi gecəsi keçirilmişdir. İstedadlı musiqiçinin ifasında Baxın, Mendelsonun, Hendelin, digər xarici bəstəkarların və rus bəstəkarlarının əsərləri səslənmişdir.

X X X

Elə həmin gün Səməd Vurğun adına Azərbaycan Dövlət Rus Dram Teatrında V.F.Komisarjevskaya adına Sankt-Peterburq Akademik Dram Teatrı “Bulvar əhvalatları” tamaşasını təqdim etmişdir.

Azərbaycan Dövlət Akademik Opera və Balet Teatrında isə L.Minkusun “Don Kixot” baleti göstərilmişdir. Əsas partiyaları Rusiyanın əməkdar artistləri Yelena Andreyenko, Yuri Klevtsov, Azərbaycanın əməkdar artistləri Mədinə Əliyeva və Ramazan Arifulin ifa etmişlər.

X X X

Nizami adına kinoteatrda isə İvan Solovovun “Axın” filminin nümayişi ilə Rusiya filmləri həftəsi başlanmışdır.

Mədəniyyət naziri Polad Bülbüloğlu açılış mərasimində çıxış edərək ölkələrimizin kino xadimlərinin müntəzəm görüşlərinin vacibliyini, bu görüşlərin kinematoqrafiya sahəsində gələcək birgə layihələr üçün şərait yaratdığını vurğuladı.

Rusiyanın xalq artistləri Anna Kamenkova və Boris Ximiçev Rusiya ilə Azərbaycan arasında mədəni əlaqələrin inkişafına töhfələrinə görə ölkələrimizin dövlət başçılarına minnətdarlıqlarını bildirdilər.