ŞƏRH
Azərbaycanın enerji siyasəti ətraf mühitin qorunmasına hədəflənib ŞƏRH
![Azərbaycanın enerji siyasəti ətraf mühitin qorunmasına hədəflənib ŞƏRH](/files/2024/2/1200x630/17176660305144845917_1200x630.jpg)
Bakı, 6 iyun, AZƏRTAC
Bu günlərdə dünya ictimaiyyəti, ekofəallar Ümumdünya Ətraf Mühitin Mühafizəsi Gününü böyük coşqu ilə qeyd edirlər. Ümumiyyətlə, bu günün qeyd olunması əhali arasında ekoloji şüurun genişləndirilməsi, ətraf mühitin mühafizəsi problemlərinə diqqətin yönəldilməsinin vacibliyindən irəli gəlib və 1972-ci il dekabrın 16-da Birləşmiş Millətlər Təşkilatının Baş Assambleyasının 27-ci sessiyasında elan edilib.
Eyni zamanda, Baş Assambleyanın həmin sessiyasında BMT sistemində yeni təşkilat - BMT Ətraf Mühit Proqramı (UNEP) yaradılıb. Azərbaycan da öz növbəsində ətraf mühit problemlərinin həlli istiqamətində UNEP-lə yaxından əməkdaşlıq edir. Təsadüfi deyil ki, 2010-cu ildə Ümumdünya Ətraf Mühit Gününün Avropa regionunda qeyd edilməsi üçün məhz Bakı şəhəri mərkəz şəhərlərdən biri olaraq seçilib.
Bunu AZƏRTAC-a açıqlamasında Milli Məclisin deputatı Məzahir Əfəndiyev deyib.
O qeyd edib ki, keçən müddət ərzində UNEP Azərbaycan Hökuməti ilə yanaşı, Heydər Əliyev Fondu ilə də yaxından əməkdaşlıq edib, birgə layihələrin həyata keçirilməsinə nail olub. Heydər Əliyev Fondunun vitse-prezidenti, Ətraf mühitin mühafizəsi naminə beynəlxalq dialoq ictimai birliyinin (IDEA) təsisçisi Leyla xanım Əliyeva UNEP-in həm mərkəzi, həm də regional ofislərində bir sıra görüşlər keçirərək ümumbəşəri ekoloji problemlərin həlli istiqamətində müzakirələr aparıb.
“Qlobal ictimaiyyət yalnız xüsusi günlərdə deyil, artıq hər gün ətraf mühitin təmiz saxlanılması və qorunması istiqamətində əməli işlər həyata keçirir. Dünyada cərəyan edən transformasiya prosesləri, eləcə də nəzərəçarpan hadisələr birbaşa olaraq ekoloji mühitin pozulması və iqlim dəyişikliyi fonunda baş verir. Bu proses özü-özlüyündə məsul dünya dövlətləri tərəfindən ciddi addımlar atılmasını, ortaya daha aydın mövqe qoyulmasını diktə edir. BMT-nin hər il təşkil olunan COP tədbirlərində biz bu istiqamətdə görülən işləri müşahidə edirik. Bu il COP29-un Azərbaycanda keçirilməsi ilə bağlı verilən qərar Azərbaycanın, xalqımızın Prezident İlham Əliyevin rəhbərliyi ilə qlobal çağırışlara hər zaman həssaslıq nümayiş etdirdiyinin, bu sahədə bütün ölkələrin maraqlarına, mənafelərinə cavab verən tədbirlərin həyata keçirilməsində göstərdiyi dəstəyin əyani sübutudur”, - deyə deputat bildirib.
O deyib: “Əsrlərdir Azərbaycan xalqının təbii sərvəti olan neft və qaz bu gün alternativ “yaşıl” enerjinin əldə edilməsində mühüm bir vasitə olaraq, ümumilikdə Azərbaycan Hökumətinin enerji siyasətinin formalaşmasına, bütün xalqların rifahına və dayanıqlı inkişafına töhfə verməkdədir. İyunun 4-6-da Bakı Enerji Həftəsi çərçivəsində 29-cu “Caspian Oil&Gas” və 12-ci “Caspian Power” sərgiləri keçirildi və dünyanın ən qabaqcıl, iddialı ölkələrinin təmsilçiləri burada iştirak edirdilər. Həftənin ən diqqətəlayiq məqamlarından biri isə Amerika Birləşmiş Ştatlarının, Türkiyə Cümhuriyyətinin, Birləşmiş Ərəb Əmirliklərinin, Avropa İttifaqının rəhbərliyinin bu tədbirə xüsusi diqqət yetirməsi və həmin ölkə liderləri tərəfindən Azərbaycan Prezidentinin şəxsinə, o cümlədən bütün tədbir iştirakçılarına edilən xoş müraciətlər idi”.
Məzahir Əfəndiyev qeyd edib ki, COP29-un əsas məqsədi kimlərin günahkar olduğunu müəyyən etmək deyil, planetin inkişafına töhfə verə biləcək yanaşmaların mexanizmə çevrilməsidir. Məhz həmin mexanizm az inkişaf etmiş, bu sahədə geridə olan dövlətlərin ətraf mühitin qorunması, eləcə də iqlim dəyişikliyi ilə mübarizə prosesində iştirakçılıqlarını təmin etmək, qəbul olunmuş qərarların icrasına nail olmaq yollarını ortaya qoyacaq.
Azərbaycan 120 ölkənin birləşdiyi, BMT-dən sonra dünyada ən böyük təsisat olan Qoşulmama Hərəkatına dörd ilə yaxın sədrliyi dövründə nümayiş etdirdiyi əzmkarlığını COP29-un keçirilməsində də göstərəcək və qarşıda duran vəzifələrə nail olmaq üçün səylərini əsirgəməyəcək.