Azərbaycanın gələcək inkişafının qarantı olan Lider
Bakı, 18 oktyabr, AZƏRTAC
1918-ci ildə müsəlman Şərqində ilk demokratik respublika Azərbaycanda qurulub. 1991-ci il oktyabrın 18-də isə Azərbaycan ikinci dəfə müstəqilliyə qovuşdu. Bu gün inamla deyə bilərik ki, Ulu Öndər Heydər Əliyev Azərbaycanın dövlət müstəqilliyinin təşəbbüskarıdır, onun banisidir. Heydər Əliyev Bakıya gəlməklə Azərbaycanda inkişaf dövrü başladı. 1993-cü il dönüş ili oldu. İlk növbədə, qanunsuz silahlı birləşmələr tərk-silah edildi, ordu quruculuğunda ciddi addımlar atıldı, dövlətçiliyin əsasları qoyuldu, sabitlik təmin edildi. Azərbaycan 1993-2003-cü illərdə öz inkişaf və sabitlik dövrünü yaşadı. Bu gün geriyə dönüb baxanda Azərbaycan reallıqları onu göstərir ki, 2003-cü ildə Azərbaycan xalqı İlham Əliyevi prezident seçməkdə düzgün edib. 2003-cü ildən bu günə qədər Azərbaycanda sürətli inkişaf dövrü yaşanır, Heydər Əliyev siyasəti uğurla davam etdirilir. Prezident İlham Əliyevin 20 ilinin yekunları göstərir ki, Azərbaycanı qarşıda daha parlaq gələcək gözləyir. Görkəmli dövlət xadimi kimi beynəlxalq miqyasda böyük nüfuz qazanan Prezident İlham Əliyev Azərbaycana siyasi mədəniyyət, milli mənəviyyatımıza uyğun siyasi əxlaq standartı, milli siyasi etika nümunəsi gətirdi.
Bu fikirləri AZƏRTAC-a açıqlamasında Azərbaycan Dövlət Pedaqoji Universitetinin Analitik və üzvi kimya kafedrasının müdiri kimya elmləri doktoru, professor Əli Zalov deyib.
O bildirib ki, iyirmi il əvvəl İlham Əliyev prezident kimi fəaliyyətə başlayanda qarşısına qoyduğu vəzifəni - ata vəsiyyətini yerinə yetirdi: torpaqlarımız işğaldan azad edildi. 44 günlük Vətən müharibəsi böyük Qələbə ilə başa çatdı. İşğal altında olan torpaqlarımız əsl sahiblərinə qaytarıldı. “Dəmir yumruq” düşmənin başını elə əzdi ki, çətin ki, bir də özlərinə gələlər. İndi bütün Qarabağ cənnətə dönür. Erməni hərbi birləşmələrinin yerlə-yeksan etdikləri şəhər və kəndlərimiz yenidən tikilir. Dədə-baba yurdlarının həsrəti ilə yaşayan soydaşlarımız evlərinə dönürlər. Oktyabrın 15-də isə Prezident, Müzəffər Ali Baş Komandan İlham Əliyev Azərbaycanın Dövlət Bayrağını Xankəndi, Xocavənd, Xocalı, Ağdərə şəhərlərində, Əsgəran qəsəbəsində və Sərsəng su anbarının ərazisində ucaltdı. Bununla da suverenliyimiz tam bərpa olundu.
“Keçən ay keçirilən antiterror tədbirləri qaçılmaz idi. Dünyanın tərəqqipərvər insanları yaxşı bilir ki, biz məsələni sülh yolu ilə həll etmək istəyirdik. Ancaq bu gün məğlubiyyətin acı nəticələrini yaşayan düşmənlərimiz bunu istəmədilər. O vaxt kinayə ilə Azərbaycan Bayrağını Xankəndidə qaldırmaq istəyirsə, səfirlik açsın bizim ölkəmizdə deyənlər, özünü “prezident”, “baş nazir” və “xarici işlər naziri” adlandıranlar bu gün istintaq təcridxanalarında öz layiqli cəzasını gözləyirlər. Bayrağımız isə Şərqi Zəngəzurda, Qarabağın bütün şəhər və kəndlərində qürurla dalğalanmaqdadır. Bu qüruru və sevinci xalqımıza bəxş edən ölkəmizin gələcək inkişafının qarantı olan Lider İlham Əliyevdir. Azərbaycan xalqı İlham Əliyevə inanır, onun daha xoşbəxt gələcək vəd edən daxili və xarici siyasətini hamılıqla dəstəkləyir”, - deyə Ə.Zalov əlavə edib.
Bölmənin digər xəbərləri
