AZƏRBAYCANIN GƏNC GİMNASTI İTALİYADA KEÇİRİLMİŞ BEYNƏLXALQ TURNİRDƏ 8-Cİ YERİ TUTMUŞDUR
Bakı, 23 iyun (AZƏRTAC). İtaliyanın Prato şəhərində bədii gimnastika üzrə beynəlxalq turnir keçirilmişdir. Azərbaycanı yarışlarda 13 yaşlı Lalə Yusifova təmsil etmişdir. Azərbaycan Gimnastika Federasiyasının mətbuat xidmətindən bildirmişlər ki, beynəlxalq arenada debütünü edən Lalə Yusifova çoxnövçülük proqramı üzrə çıxışların nəticələrinə görə 8-ci yeri tutmuşdur. Mütəxəssislərin rəyinə görə, Lalə topla hərəkətlərdə uğurlu çıxış etmişdir. Qeyd edək ki, turnirdə ilk üç yerin sahibi Rusiya, İtaliya və Bolqarıstan gimnastları olmuşlar.
Bu həftə qadın gimnastlar daha iki turnirdə iştirak edəcəklər. Onlardan birincisi gənc qızlar üçün Kislovodskidə (24-25 iyun) keçiriləcəkdir. Həmin turnirdə ölkəmizi Mənsurə Bağıyeva və Yekaterina Prokopenko (hər ikisi 1997-ci il təvəllüdlü), habelə Səbinə Hümmətova (1999) təmsil edəcəklər. İkinci yarış qadın gimnastlar üçün təşkil ediləcəkdir. Hollandiyada dünyanın ən yaxşı qrup kollektivləri “Amsterdam Macters” turnirinə qatılacaqlar. Baş məşqçi Mariana Vasilyevanın rəhbərlik etdiyi Azərbaycanın qrup komandası iki növ üzrə - 5 halqa və 3 lent /2 iplə yarışacaqdır.
Bölmənin digər xəbərləri
