Azərbaycanın inkişafına böyük töhfələr vermək hər bir gəncin müqəddəs borcudur
Bakı, 2 fevral, AZƏRTAC
Biz müasir gənclər üçün bu gün ən başlıca vəzifə Azərbaycanın müstəqilliyini, milli maraqlarını qorumaq, onun hərtərəfli inkişafında yaxından iştirak etməkdir. Azərbaycan Prezidenti çıxışlarında dəfələrlə gənclərimizə inandığını, onlara güvəndiyini bildirib. Bu gün gənc kadrlar ən müxtəlif sahələrdə mühüm mövqelər tutaraq, onlara bəslənilən etimadı layiqincə doğruldurlar. 2 fevral - Azərbaycan Gəncləri Günü həm də hər bir gəncin özünə hesabat verdiyi gündür. Müasir, güclü Azərbaycan gənci kimi daha fəal, bilikli, vətənpərvər olaraq dövlətimizin, xalqımızın inkişafına böyük töhfələr vermək hər birimizin müqəddəs borcudur.
Bu sözləri AZƏRTAC-a müsahibəsində Bakı Dövlət Universitetinin tələbəsi, könüllü kimi fəaliyyət göstərən Həqiqət Məmmədzadə deyib.
H.Məmmədzadə bildirib ki, hər bir vətəndaş öz üzərinə düşən vətəndaşlıq borcunu layiqincə yerinə yetirmək üçün yüksək potensiala malik olmalıdır. Əsası ulu öndər Heydər Əliyev tərəfindən qoyulan və Prezident İlham Əliyevin uğurla davam etdirdiyi uğurlu siyasət, güclü və yenilməz Azərbaycan Ordusunun böyük şücaəti sayəsində ərazilərimiz qısa müddətdə erməni işğalçılarından azad edildi, Qarabağ həsrətinə son qoyuldu. 44 günlük Vətən müharibəsində gənclərimizin nümayiş etdirdikləri milli ruh, böyük vətənpərvərlik hissi cəmiyyətdə sözlə ifadə edilməyəcək qürur hissi yaratdı. Heydər Əliyev məktəbinin, İlham Əliyev idarəçiliyinin yetirmələri olan bu gənclər Vətən naminə canlarını belə fəda etməkdən çəkinmədilər. Ümummilli lider Heydər Əliyev ideallarına sadiq olan gənclərimizin hər birinin Vətən sevgisi, yurd məhəbbəti onların bir yumruq kimi sıx birləşməsinə və tarixi Qələbəyə imza atmasına səbəb oldu.
“Bu mübarizə bu gün də davam edir və gənclərimiz məkrli düşmənin yalanlarını ifşa etmək, beynəlxalq ictimaiyyətdə düzgün fikir yaratmaq üçün xüsusi fədakarlıq nümayiş etdirirlər. Bu gün gənclərimiz harada çalışırlarsa, bilik və bacarıqlarını Azərbaycanın möhkəmlənməsinə və daha da inkişafına yönəltməlidirlər. Bunun üçün gənclərimiz yüksək potensiala, zəngin dünyagörüşə malik olmalı, dünyanın ən qabaqcıl texnologiyalarına can atmalıdırlar. Biz daha fəal olmalı, doğma Azərbaycanımızı inkişaf etdirməliyik. Çünki bu, bizim Azərbaycanımızdır, bizim Vətənimizdir. Bu sözləri bir azərbaycanlı olaraq qürurla səsləndiririk. Bizim qüdrətli dövlətimiz və arxalandığımız güclü liderimiz var!”, - deyə fəal gənc vurğulayıb.
Bölmənin digər xəbərləri
