Azərbaycanın Milli Qəhrəmanı Albert Aqarunovun qisasını Vətən müharibəsində onun davamçısı olan tankçılar aldılar
Bakı, 25 aprel, AZƏRTAC
Bugünkü Albert Aqarunovun anım tədbirində onun davamçıları olan tankçılar iştirak edir. Biz həmin briqadanın hərbçiləri ilə sıx əməkdaşlıq edirik. Albert çox şən, həyatsevər oğlan idi. Mən o vaxt ondan soruşdum ki, səni bu müharibədə iştirak etməyə nə vadar edir. O mənə dedi ki, komandir, mən istəyərəm bu müharibədə iştirak edim. Çünki mən bu torpaqlarda doğulmuşam.
Bu fikirlər AZƏRTAC-a müsahibəsində aprelin 25-də yəhudi əsilli tank komandiri, Azərbaycanın Milli Qəhrəmanı Albert Aqarunovun doğum günü ilə əlaqədar keçirilən anım mərasimində Tankçı Veteranlar İctimai Birliyinin sədri Hacı Əzimov deyib.
Hacı Əzimov bildirib ki, Milli Qəhrəman Albert Aqarunov Azərbaycan Ordusunda doğrudan da çox fədakarlıq göstərib. O, döyüşlərdə doqquz tank vurmuşdu. Bir mərmi ilə iki texnika yan-yana gələndə onları vuraraq mərmiyə qənaət edirdi. Albert Aqarunovun öldürülməsi üçün o vaxtlar ermənilər çoxlu mükafatlar vəd etmişdilər. Birinci Qarabağ müharibəsi vaxtı Şuşada ağır döyüşlər gedirdi, yaralılar və şəhidlərimiz çox idi. Albert tanklara mərmiləri özü doldurub döyüş bölgəsinə gedirdi. Lakin o, düşmənin snayper gülləsindən vurularaq Şuşada şəhid oldu. Bakıda Şəhidlər xiyabanında dəfn edildi.
Biz Milli Qəhrəman Albert Aqarunovun qanını yerdə qoymadıq. 44 günlük Vətən müharibəsində Albertin davamçısı olan tankçılar onun qisasını aldılar. Ötən il Şuşa şəhərinə Azərbaycanın Milli Qəhrəmanı Albert Aqarunovun şəhid olduğu ərazilərə getdik. Səfərdə veteran tankçılar, Birinci Qarabağ savaşında şəhid olan tankçıların ailə üzvləri iştirak edirdilər.
Ümumiyyətlə, biz tankçılar Həzi Aslanovun davamçılarıyıq. Həzi Aslanov tankçılar üçün vəsiyyət qoyub ki, dünyanın ən yaxşı tankçıları Azərbaycandan çıxır.
Albertin Şuşada şəhid olduğu yerdə onun büstünün qoyulması, onun adına park salınması və Sinaqoqun tikilməsi üçün müvafiq dövlət orqanlarına müraciət edəcəyik.
Qeyd edək ki, yəhudi əsilli tank komandiri Albert Aqarunov Birinci Qarabağ müharibəsi zamanı 1992-ci il mayın 8-də Şuşa uğrunda gedən döyüşlərdə şəhid olub.
Bölmənin digər xəbərləri
