AZƏRBAYCANIN QARSDAKI BAŞ KONSULLUĞUNDA 20 YANVAR FACİƏSİNİN İLDÖNÜMÜ İLƏ BAĞLI TƏDBİR KEÇİRİLMİŞDİR
Ankara, 20 yanvar (AZƏRTAC). Azərbaycanın Qarsdakı baş konsulluğunda 20 Yanvar faciəsinin 20-ci ildönümü ilə bağlı tədbir keçirilmişdir.
Baş konsul Həsən Zeynalov çıxışında bildirmişdir ki, sovet qoşun hissələrinin yanvarın 19-dan 20-nə keçən gecə Bakıda törətdiyi qətliam insanlıq tarixinə qara səhifə kimi yazılmışdır. Ölkəsinin ərazi bütövlüyü uğrunda mübarizəyə qalxmış dinc insanlara qarşı edilmiş bu vəhşilik çökməkdə olan rejimin cinayətkar mahiyyətini göstərmişdir. Mixail Qorbaçovun qısqanclığı və ermənilərin fitnə-fəsadı ilə 1987-ci ildə Sovet İttifaqının rəhbərliyindən uzaqlaşdırılan, həmin ildən təqib və təzyiqlərə məruz qalan ulu öndər Heydər Əliyev Bakıda baş vermiş faciənin ertəsi günü sovet rəhbərliyinin Azərbaycan xalqına qarşı vəhşiliyini kəskin tənqid etmişdir. O ağır günlərdə qardaş türk xalqı bizim yanımızda olmuş, dərdimizi bölüşmüşdür. Bu qətliam azadlıq mübarizəsinə qalxmış xalqımızın əzmini qıra bilmədi. Biz, bütün Azərbaycan və türk şəhidlərimizin xatirəsini böyük ehtiramla anırıq.
Oqtay Bayramov
AZƏRTAC-ın xüsusi müxbiri
Ankara
######
Bölmənin digər xəbərləri
