Azərbaycanın Qoşulmama Hərəkatına sədrliyi ölkəmizin beynəlxalq aləmdəki nüfuzunun göstəricisidir
Bakı, 12 oktyabr, AZƏRTAC
Azərbaycan Qoşulmama Hərəkatına üzv dövlətlərin əməkdaşlığının parlamentlərarası istiqamətini də inkişaf etdirmək niyyətindədir. Ölkəmiz 2023-cü ilədək Qoşulmama Hərəkatına sədrlik edəcək. Tarixdə ilk dəfə Avropa İttifaqının rəhbərləri Qoşulmama Hərəkatının onlayn Zirvə görüşündə iştirak ediblər. Avropa İttifaqına üzv dövlətlər Qoşulmama Hərəkatının BMT Baş Assambleyasının xüsusi sessiyasının keçirilməsi təşəbbüsünü dəstəkləyib. Qoşulmama Hərəkatı və Avropa İttifaqı BMT-nin İnsan Hüquqları Şurası çərçivəsində bir sıra məsələlərlə bağlı əməkdaşlıq edir.
AZƏRTAC xəbər verir ki, bu fikirləri Yeni Azərbaycan Partiyası (YAP) Yasamal rayon təşkilatının sədri Bəxtiyar Nəbiyev ifadə edib.
Azərbaycanın Qoşulmama Hərəkatı çərçivəsində həmrəyliyin artırılması, beynəlxalq arenada Hərəkatın mövqeyinin və nüfuzunun gücləndirilməsi sahəsində birgə səylər göstərməkdə davam etdiyini bildirən B.Nəbiyev deyib: “Pandemiyadan sonra bərpa mərhələsinə dair fikir mübadiləsinin aparılması və Hərəkatın mövqeyinin müəyyənləşdirilməsi üçün Qoşulmama Hərəkatına üzv dövlətlərin yüksəksəviyyəli iclasının keçirilməsinə ehtiyac var və bu, faydalı ola bilər. Pandemiyanın yaratdığı çətinlikləri nəzərə alaraq, Qoşulmama Hərəkatı tərəfindən COVID-19-dan sonra qlobal bərpaya dair BMT-nin Yüksək Səviyyəli Panelinin yaradılması təşəbbüsü ilə çıxış edilməsi məqsədəmüvafiqdir”.
2020-ci ilin Azərbaycan üçün əlamətdar il olduğunu xatırladan YAP Yasamal rayon təşkilatının sədri deyib ki, Hərəkatın gündəliyində duran vacib məsələlərdən biri uğurla həll edildi. Ermənistan 30 ilə yaxın idi ərazilərimizin təqribən 20 faizini işğal altında saxlayırdı. Ermənistan azərbaycanlılara qarşı etnik təmizləmə aparıb. Artıq Qarabağ münaqişəsi tarixə qovuşub. Azərbaycan 30 illik münaqişəyə son qoyub, hərbi-siyasi yollarla özünün ərazi bütövlüyünü və tarixi ədaləti bərpa edib. Qırx dörd günlük müharibə nəticəsində tam məğlubiyyətə uğrayan Ermənistan ötən il noyabrın 10-da kapitulyasiya aktına imza ataraq, Azərbaycanın işğal altındakı digər ərazilərindən qoşunlarını çıxarmağa məcbur oldu. Azərbaycan özü BMT Təhlükəsizlik Şurasının münaqişə ilə bağlı qəbul etdiyi qətnamələri yerinə yetirdi.
“Qoşulmama Hərəkatı ölkələrinin beynəlxalq hüquqa və BMT Təhlükəsizlik Şurasının qətnamələrinə uyğun olaraq, Azərbaycanın ərazi bütövlüyünə və suverenliyinə müntəzəm dəstəyi çox qiymətlidir. Hazırda azad olunmuş ərazilərdə yenidənqurma işlərinə başlanılıb. Həmin ərazilərdə müasir şəhərsalma planlaşdırılması həyata keçirilir. Bu ərazilər “yaşıl enerji” zonası olacaq”, - deyə o fikirlərini tamamlayıb.
Bölmənin digər xəbərləri
