AZƏRBAYCANIN TƏHSİL NAZİRİ YUNESKO-DA ÇIXIŞ ETMİŞDİR
Azərbaycan 1991-ci ildə müstəqillik əldə etdikdən sonra, ilk növbədə, dəyərlər əsasında qısa bir vaxtda bütün proqramların, dərsliklərin, dərs vəsaitlərinin, təlim materiallarının yenidən hazırlanması və təzə qəbul edilmiş latın qrafikalı əlifba ilə nəşri zərurəti yaranmışdı. Ermənistanın Azərbaycana təcavüzü də təhsilə ciddi zərbə vurmuşdur. İşğal edilmiş ərazilərdə 1000-ə yaxın təhsil müəssisəsi dağıdılmış,115 min şagird və 16 minə yaxın müəllim məcburi köçkün düşmüşdür.
Lakin bütün bunlara baxmayaraq, ictimai-siyasi sabitlik və iqtisadi inkişaf bütün sahələrdə olduğu kimi, təhsildə də irəliləyişə imkan yaratmışdır.
Nazir bildirmişdir ki, Dakar forumunun məqsədlərindən olan «Erkən yaşlı uşaqların tərbiyəsi və təhsilin yaxşılaşdırılması» istiqamətində Asiya İnkişaf Bankı ilə birlikdə 2006-2010-cu illəri əhatə edən kredit layihəsi məktəbəqədər təhsilin keyfiyyətinin yüksəldilməsi, uşaqların təhsilə cəlb olunması səviyyəsinin 50 faizə çatdırılması və digər sahələri əhatə etmişdir. Bu layihə məktəbəqədər təhsilin təkmilləşdirilməsi üzrə hazırlanmış Dövlət proqramının tərkib hissəsidir. BMT-nin «2005-2014-cü illərdə Davamlı inkişaf üçün təhsil proqramı»na uyğun olaraq, Azərbaycanda təhsilin müxtəlif sahələri üzrə ümumilikdə 15 dövlət proqramı həyata keçirilir. Ümumi orta təhsilin keyfiyyətinin yüksəldilməsi və bütün uşaqlar üçün bərabər imkanların yaradılması istiqamətində həyata keçirilən məktəb tikintisi proqramına əsasən, 1998-2005-ci illərdə 330-dan artıq yeni məktəb binası inşa edilmiş, “Yoxsulluğun azaldılması və iqtisadi inkişaf proqramı”na uyğun olaraq son üç ildə məktəblərdə bütün siniflərin şagirdləri dərsliklərlə pulsuz təmin edilmiş və təhsil almaq üçün bərabər imkanlar yaradılmışdır.
2005-2007-ci illərdə 4542 məktəbin ən müasir kompüterlərlə təchiz edilməsi, hər 33 şagirdə bir kompüter nisbətinin reallaşdırılması nəzərdə tutulmuşdur. 2005-2009-cu illərdə müxtəlif fənlər üzrə pedaqoji kadrlara ehtiyacı olan məktəblərin 7 min müəllimlə təmin edilməsi, onlar üçün xüsusi stimullaşdırıcı tədbirlərin həyata keçirilməsi qərara alınmışdır.
Hazırda Dünya Bankının ayırdığı kredit hesabına Azərbaycanda 2003-2007-ci illəri əhatə edən Təhsil sektorunun inkişafı layihəsi həyata keçirilir. Bu layihələr əsasən, ümumi təhsilin keyfiyyəti və real tələbatlara uyğunluğu, səmərəlilik və maliyyə islahatları, idarəetmə, planlaşdırma və monitorinq komponentləri üzrə aparılır.
M.Mərdanov demişdir ki, Təhsil Nazirliyinin beynəlxalq əlaqələri də xeyli genişlənmişdir. Hazırda dünyanın 30-dək dövləti ilə təhsil əlaqələri yaranmış, 20-dən artıq beynəlxalq təşkilatla ümumilikdə 60-dan çox birgə layihə və proqramlar həyata keçirilir. YUNESKO ilə əməkdaşlıq da uğurla inkişaf edir. Bu əməkdaşlıq «Təhsil hamı üçün» , «Assosiativ məktəblər», «Texniki-peşə təhsilinin inkişafı», «İnkluziv təhsil» və «Ali məktəblərdə YUNESKO kafedralarının yaradılması» layihələrini əhatə edir. 2005-ci ildə YUNESKO-nun təşəbbüsü ilə Azərbaycanda təhsilin inkişafına həsr olunmuş iki konfrans təşkil edilmişdir. Birinci konfrans bu ilin iyun ayında Parisdə, ikinci konfrans isə avqustda Baş direktor cənab Koişiro Matsuuranın iştirakı ilə Bakıda keçirilmişdir. Bakı konfransında YUNESKO ilə Azərbaycan arasında əməkdaşlığa dair Memorandum imzalanmışdır.
Azərbaycanın təhsil nazirinin çıxışı iştirakçılar tərəfindən maraqla qarşılanmışdır. İmzalanmış memoranduma uyğun olaraq, hər tərəfdən 5 nəfər olmaqla xüsusi işçi qrupunun yaradılması nəzərdə tutulur.
Nazirin Parisə səfəri zamanı işçi qrupunun ilk iclasının dekabrda Bakıda keçirilməsi qərara alınmışdır. İclasda qəbul edilmiş prioritetlər üzrə konkret təkliflər və gələcək iş planı ətrafında fikir mübadiləsi aparılacaqdır.
Bölmənin digər xəbərləri
