AZƏRBAYCANIN TÜRKİYƏ İLƏ İQTİSADİ ƏLAQƏLƏRİ YÜKSƏLƏN XƏTLƏ İNKİŞAF EDİR
AZƏRTAC xəbər verir ki, avqustun 14-də Türkiyə Əməkdaşlıq və İnkişaf Agentliyinin (TİKA) rəhbəri Musa Kulaklıkayanın başçılıq etdiyi nümayəndə heyəti İqtisadi İnkişaf Nazirliyində olmuşdur.
Nazir Heydər Babayev Azərbaycanın qardaş Türkiyə ilə iqtisadi əlaqələrinin yüksələn xətlə inkişaf etdiyini vurğulamış, bu sahədə TİKA ilə səmərəli əməkdaşlığı, təşkilatın Azərbaycanda ilk sənaye şəhərciyinin yaradılmasına dəstək layihəsini yüksək qiymətləndirmişdir.
M.Kulaklıkaya ölkəsinin Azərbaycanla geniş əməkdaşlığından məmnunluğunu söyləmiş, özəl bölmənin təşviqi, standartlaşdırma, təhsil, bank işi, səhiyyə və digər sahələrdə əlaqələrin inkişafı üçün böyük imkanların olduğunu bildirmişdir.
Görüşdə iş adamları arasında əlaqələrin genişlənməsində biznes forumlarının, sərgilərin keçirilməsinin əhəmiyyəti vurğulanmışdır.
Müzakirələrdə Azərbaycan Türkiyə İş Şurası toplantısının keçirilməsi məsələsinə də toxunulmuş, növbəti yığıncağın cari ilin noyabrında təşkili məqsədəuyğun sayılmışdır.
Görüşdə TİKA-nın Azərbaycan üzrə əlaqələndiricisi Əbubəkir Çelik və Türkiyənin Azərbaycandakı səfiri Hulusi Kılıc iştirak etmişlər.
Bölmənin digər xəbərləri
