Azərbaycanlı tələbə İspaniyada Xocalı soyqırımı ilə əlaqədar aksiya təşkil edib
Madrid, 19 fevral, AZƏRTAC
İspaniyanın Vitoria- Gasteiz şəhərində yerləşən Bask Ölkə Universitetində azərbaycanlı tələbə-tədqiqatçı Fatma Qurbanzadə tərəfindən “Xocalı - Vəhşiliyin görünməmiş üzü. Haqq yandıran çırağınız sönməz olsun!” adlı aksiya təşkil edilib.
Aksiyada çıxış edən F.Qurbanzadə 1992-ci il fevralın 25-dən 26-na keçən gecə erməni qəsbkarları tərəfindən törədilmiş Xocalı qətliamı barədə məlumat verib. Bildirilib ki, bir gecə ərzində 106-sı qadın, 63-ü uşaq, 70-ci qoca olmaqla 613 soydaşımız xüsusi qəddarlıqla qətlə yetirilib, cəsədlər üzərində təhqiredici hərəkətlərə yol verilib. Həmin kütləvi qırğında 8 ailə tamamilə məhv edilib, 25 uşaq hər iki valideynindən, 130 uşaq isə valideynlərinin birindən məhrum olub. 487 dinc Xocalı sakini ağır yaralanıb, 1275 nəfər girov götürülüb.
Bask Ölkə Universitetində təhsil alan müxtəlif ölkələrdən onlarla tələbə aksiyada iştirak edərək “Xocalıya ədalət!” şüarı səsləndiriblər.
Aygün Əliyeva
AZƏRTAC-ın xüsusi müxbiri
Madrid
Bölmənin digər xəbərləri
