Azərbaycanlılardan təşkil olunmuş komanda Almaniyada futbol turnirində iştirak etmişdir
Bakı, 14 iyul (AZƏRTAC). Almaniyada yaşayan azərbaycanlılardan ibarət futbol komandası həvəskar mini futbol turnirində təmsil olunmuşdur.
Dİasporla İş üzrə Dövlət Komitəsindən AZƏRTAC-a bildirmişlər ki, Almaniyanın Aşağı Saksoniya federal əyalətinin paytaxtında həvəskar futbolçulardan ibarət komandalar Hannover Beynəlxalq kuboku uğrunda mübarizə aparmışlar.
Turnirdə 20 ölkəni və xalqı təmsil edən komandalar iştirak etmişlər. Tunirin püşkatma mərasimi mayın 28-də keçirilmiş və bu mərasimdə Azərbaycanı Hannover şəhərində fəaliyyət göstərən Heydər Əliyev adına İdman Klubunun rəhbəri Etibar Qəniyev təmsil etmişdir.
Püşkatmanın nəticələrinə görə, Azərbaycan Kosovo, Rusiya, Qana və Cənubi Amerika ölkələri kimi güclü rəqiblərlə eyni qrupa düşmüşdür. Azərbaycan yığması Vüqar Həbibovun rəhbərliyi altında rəqiblərə qarşı gözəl və əzmkar oyun nümayiş etdirmişdir. İkinci dəfə belə bir turnirə qatılan Azərbaycan komandası üzvlərinin sürətli, texniki bacarığı azarkeşlərə xoş təsir bağışlamışdır.
Diasporla İş üzrə Dövlət Komitəsinin yaxından dəstəyi ilə yaradılan və turnirdə iştirakı təmin edilən Azərbaycan komandasının tərkibində bir çox peşəkar oyunçular, o cümlədən 9 yaşından Almaniyada futbolla məşğul olan, “Hannover 96” kimi məşhur futbol klubunun yarımmüdafiəçi, 16 yaşlı Cavid Həbibov da iştirak etmişdir.
Turnir boyu azərbaycanlılar rəqiblərinə qarşı bərabər oyun nümayiş etdirərək Qana komandasını 2:1 hesabı ilə məğlub etmiş, Cənubi Amerika komandası ilə oyunu isə 1:1 hesabı ilə bitirmişdir. Hannover Kubokunun sahibi isə kamerunlu həvəskar futbolçular olmuş, 2 və 3-cü yeri isə müvafiq olaraq İspaniya və Rusiya paylaşmışlar.
“Əsas qələbə yox, iştirakdır” - devizi ilə keçirilən bu turnirdə Azərbaycan bayrağının dalğalanması və himninin səslənməsi soydaşlarımızı sevindirmiş, onlarda xoş təəssürat yaratmışdır. Almaniyanın müxtəlif əyalətlərindən gəlmiş həmvətənlərimiz stadionda sürəkli alqışlarla komandamıza dəstək göstərmişlər. Nordrayn-Vestfaliya federal əyalətindəki Alman-Azərbaycan Mədəniyyət Cəmiyyətinin sədri Təranə Tağıyeva isə öz fəallığı ilə xüsusi seçilmişdir.
Çempionatın sonunda Heydər Əliyev adına İdman Klubunun rəhbəri Etibar Qəniyev, Hannover şəhər bələdiyyəsinin sədri Stefan Şostok Azərbaycan yığmasının üzvləri ilə xatirə şəkilləri çəkdirmişlər.
Etibar Qəniyev bildirmişdir ki, azərbaycanlıların belə turnirlərdə iştirakı onları gələcəkdə müxtəlif idman növlərində inkişaf etdirmək, beynəlxalq yarışlara hazırlamaq, eləcə də soydaşlarımızın alman cəmiyyətinə inteqrasiyasını sürətləndirmək və ölkəmizin imicini yüksəltmək məqsədi daşıyır. O demişdir ki, rəhbərlik etdiyim idman klubunun əsas məqsəd və vəzifələri də məhz budur.
Bölmənin digər xəbərləri
