Bakı, 12 may, AZƏRTAC

“Azərpoçt” MMC tərəfindən təsis edilən, sürətli poçt xidmətləri göstərən “Azərekspresspoçt” rabitə müəssisəsi (EMS - Express Mail Service) 2022-ci ildəki fəaliyyətinin nəticəsinə görə Beynəlxalq EMS Kooperativi tərəfindən 2 kateqoriya üzrə eyni zamanda iki qızıl mükafat alıb.

MMC-dən AZƏRTAC-a bildirilib ki, hər il Ümumdünya Poçt İttifaqının EMS Kooperativi dünyanın bütün ölkələrinin EMS operatorlarının il ərzində göstərdiyi poçt xidmətlərinin keyfiyyət göstəricilərini araşdırır, qiymətləndirir və yekun nəticələrə əsasən təsis etdiyi mükafatları (“Performans” mükafatı və “Müştəriyə qayğı” mükafatı) operatorlara təqdim edir.

EMS Azərbaycan 2022-ci ildəki fəaliyyətinə görə hər iki kateqoriyanın qızıl mükafatına layiq görülüb.

Qeyd edək ki, “Performans” mükafatı üzrə qızıl mükafatın qazanılması üçün qarşıya qoyulan 9 tələbdən minimum 5-nə EMS operatoru cavab verməlidir. Lakin EMS Azərbaycan nəinki 5, hətta 7 tələbə cavab verərək, qızıl mükafata layiqliyini sübut edib. Həmin tələblər bunlardır:

1) Xaric olan poçt göndərişlərinin standarta uyğun vaxtında, ən azı 95 faiz göstərici ilə ixrac olunması - EMS Azərbaycanda bu göstərici 98 faiz olub.

2) Xaric olan poçt göndərişlərinin standarta uyğun ən azı 80 faiz göstərici ilə vaxtında daşınması - EMS Azərbaycanda bu göstərici 81 faiz olub.

3) M40 standartına uyğunluq “Mövcuddur” göstəricisi ilə təmin olunub.

4) PREDES elektron mesajlarının partnyor ölkələrin sayına nisbəti ən azı 95 faiz təşkil etməlidir - EMS Azərbaycanda bu göstərici 100 faiz olub.

5) RESDES elektron mesajlarının PREDES elektron mesajlarına nisbəti ən azı 95 faiz təşkil etməlidir - EMS Azərbaycanda bu göstərici 95 faiz olub.

6) Çatdırma məlumatlarının beynəlxalq poçt sisteminə işlənilməsi ən azı 99 faiz təşkil etməlidir - EMS Azərbaycanda bu göstərici 99 faiz olub.

7) Xaric olan poçt göndərişləri üçün ITMATT elektron mesajlarının EMC elektron mesajlarına nisbəti ən azı 60 faiz təşkil etməlidir - EMS Azərbaycanda bu göstərici 98 faiz olub.

Digər kateqoriya olan “Müştəriyə qayğı” mükafatını qazanmaq üçün isə aşağıdakı 7 meyar EMS operatoru tərəfindən yerinə yetirilməli idi:

1) EMS Kooperativinin üzvü olmaq - “Azərekspresspoçt” 1998-ci ildən EMS Kooperativinin üzvüdür.

2) İl ərzində hər ay EMS müştəriyə xidmət adlı sistemdən istifadə olunması - “Azərekspresspoçt” 2022-ci ildə hər ay Universal Poçt İttifaqının “i-Care” sistemindən istifadə edib.

3) Sorğulara vaxtında, ən azı 98 faiz göstərici ilə cavab vermək - EMS Azərbaycanda bu göstərici 100 faiz olub.

4) Birinci səviyyədən sonra bağlanmış (həll olunmuş) sorğular ən azı 70 faiz təşkil etməlidir - EMS Azərbaycanda bu göstərici 97 faiz olub.

5) 15 iş günü ərzində sorğular üzrə iş prosesini ən azı 90 faiz göstərici ilə bitirmək - EMS Azərbaycanda bu göstərici 99 faiz olub.

6) Alınmış sorğuların və cavabların oxunması üçün orta vaxt - maksimum 3 saat təşkil etməlidir - EMS Azərbaycanda alınmış sorğuların oxunması üçün orta vaxt 00:15:55, alınmış cavabların oxunması üçün orta vaxt isə 01:35:30 təşkil edib.

7) Araşdırılmamış daxil olan sorğuların olmaması tələbinə uyğunluq da EMS Azərbaycanda tam təmin edilib, araşdırılmamış sorğu qalmayıb.

O da qeyd olunmalıdır ki, axırıncı dəfə “Performans” mükafatını “Azərekspresspoçt” 2015-ci ildə, “Müştəriyə qayğı” mükafatını isə 2019-cu ildə qazanıb.

EMS Azərbaycan öz fəaliyyətini beynəlxalq standartlara uyğun qurmaq və müştərilərinin məmnuniyyətini təmin etmək üçün cəhdlər göstərir, daima təkmilləşmə proseslərini nəzarətdə saxlayır.