“AZƏRİKİMYA” ŞİRKƏTİNİN RƏHBƏRLİYİ LONDONDA DÜNYANIN APARICI ŞİRKƏTLƏRİ İLƏ MEMORANDUM VƏ MÜQAVİLƏ İMZALAMIŞDIR
Bu möhtəşəm layihənin həyata keçirilməsi Azərbaycanın daxili tələbatını ödəməklə barəbər, “Azərikimya” Dövlət Şirkətinə dünya bazarında mövqelərini xeyli möhkəmləndirməyə imkan verəcəkdir.
Ən müasir texnologiyalar əsasında yaradılacaq 19 zavoddan ibarət yeni kompleks geniş çeşiddə neft-kimya məhsulları və azot gübrələri istehsalı üzrə nəinki regionda, həm də bütün MDB məkanında ən iri müəssisə olacaqdır. Bu kompleks iqtisadiyyatın tikinti materiallarına, plastik boru və profillərə, boya, lak və həlledicilərə, kimyəvi reagentlərə, rezin məmulatına, müxtəlif təyinatlı sintetik materiallara, mebel ləvazimatına, məişət avandanlığına, eləcə də sənaye və məişət təyinatlı qablara tələbatını tam təmin etməyə imkan verəcəkdir.
Kompleksdə qazın separasiya üsulu ilə təmizlənməsi üçün xammal qurğusu, ammonyak və karbamid istehsal edən qurğu, buxar krekinqi qurğusu, eləcə də müxtəlif olefinlər, poliolefinlər və ətirli neft-kimya məhsulları istehsal edən çoxsaylı qurğuların inşası nəzərdə tutulmuşdur.
Hazırda baş podratçının seçimi üzrə işlərə başlanmışdır.
Yeni kompleks ölkənin qeyri-neft sektorunun inkişafına güclü təkan verəcək, çoxprofilli və yüksək maaşlı iş yerləri açılmasına şərait yaradacaqdır. Müasir texnologiyalarla təchiz edilmiş qurğu və avadanlıqların quraşdırılacağı neft-kimya kompleksində işləməyi bacaran kadr potensialı hazırlamaq məqsədi ilə bu sahədə ixtisaslaşan beynəlxalq şirkətlər artıq müvafiq uzunmüddətli treninqlər keçirməyə başlamışlar.
Layihə üzrə işlər 2006-cı ildə Prezident İlham Əliyevin Azərbaycanda neft-kimya və kimya sənayesinin inkişaf perspektivləri ilə əlaqədar tapşırıqlarına müvafiq olaraq “Azərikimya” dünyanın ən iri şirkətləri ilə əməkdaşlıq şəraitində layihə üzrə zəruri sənədlər dəstini hazırlayıb dövlət başçısına təqdim edəndən sonra başlanmışdır. Şirkətin tərəfdaşları arasında texniki məsləhətçi “Tecnhip”, layihənin texniki-iqtisadi əsaslandırılmasını hazırlayan “Nexant”, hüquqi məsələlər üzrə məsləhətçi “White & Casse” və maliyyə məsləhətçisi “Societe Generale” bankı vardır.
“Azərikimya” Şirkətinin prezidenti Məcid Kərimovun sözlərinə görə, bu layihənin həyata keçirilməsi sürətlə inkişaf edən ölkəmizin iqtisadi yüksəlişinin yeni uğuru olacaq, Xəzər dənizi ilə Aralıq dənizi arasındakı geniş bir ərazini əhatə edən regionda neft-kimya və kimya sənayesi sahələrində Azərbaycanın uzun illər boyu liderliyini təmin edəcəkdir.
Bölmənin digər xəbərləri
