“Azərişıq” yeni elektron xidmətlərini açıqlayıb
Bakı, 12 iyun, AZƏRTAC
“Azərişıq” ASC-də tətbiq olunan yeni elektron xidmətlər açıqlanıb.
AZƏRTAC xəbər verir ki, ASC-nin Enerji satışı departamentinin direktor müavini Vüqar Nəbibəyli enerji təchizatı müəssisəsi olan qurumun fəaliyyətinin hüquqi normativ aktlarla tənzimləndiyini diqqətə çatdırıb. Bildirib ki, Azərbaycan Respublikası Nazirlər Kabineti tərəfindən 2005-ci il 2 fevral tarixli Qərarla təsdiqlənmiş “Elektrik Enerjisindən İstifadə Qaydaları”nda istehlakçılara istifadə edilmiş elektrik enerjisi dəyərinin bildiriş, qəbz və ödəniş sənədi əsasında təqdim olunması qeyd edilir. Hesablaşma sayğacının göstərişinin qeyd edilməsi və elektrik enerjisi sərfinə görə ödəniş sənədinin yazılması enerji təchizatı müəssisəsinin səlahiyyətli nümayəndələri tərəfindən yerinə yetirilir. Hesablaşma dövrü bir ay qəbul olunur, güzəşt limiti və limitdən artıq enerji sərfiyyatının müəyyən edilməsi və buna görə ödəniş qəbzinin verilməsi bir ay ərzində istifadə olunan elektrik enerjisinə görə verilir. Sayğac göstəriciləri əraziyə xidmət edən əməkdaşlar tərəfindən oxunduğu anda dərhal bildiriş çap olunur və istehlakçıya təqdim edilir.
O qeyd edib ki, bəzi hallarda təqdim olunan bildirişlərin istehlakçılar tərəfindən şəxsən əldə edilməməsi hallarının aradan qaldırılması və tətbiq edilmiş xüsusi karantin rejimi səbəbi ilə istehlakçılarla ərazi personalları arasında təmasın minimuma endirilməsi məqsədilə Nazirlər Kabineti tərəfindən “Elektrik Enerjisindən İstifadə Qaydaları”nın müvafiq bəndlərinə bildiriş, qəbz, ödəniş vərəqi sözləri ilə bərabər elektron bildiriş və SMS xidmətləri sözlərinin əlavə edilməsinə dair qərar qəbul edilib. Qərara əsasən, edilmiş dəyişikliklər hesabına həm personal ilə istehlakçılar arasında olan təmas minimuma endirilmiş olacaq, həmçinin enerji təchizatı müəssisəsi tərəfindən paylanmış elektrik enerjisi dəyərinin yığım prosesinin qaydaların tələb etdiyi müddətdə həyata keçirilməsinə müsbət təsir göstərəcək.
“Azərişıq” ASC-nin İnformasiya texnologiyaları departamentinin direktoru Qalib Həmidov deyib ki, bildirişlər təqdim edilərkən abonent mənzildə olmaması və ya müxtəlif səbəblərdən borclu olduğundan məlumatsız olur və ödəmələrdə gecikmələr yaranır. Qəbul edilmiş dəyişiklər istiqamətində elektron xidmətlərin kütləvi tətbiqi zamanı hesablaşmaya dair məlumatların əldə edilməməsi kimi problemlər tamamilə aradan qalxacaq. Kütləvi tətbiq üçün istehlakçılarında dəstəyi danılmaz faktdır. “Azərişıq” ASC-nin rəsmi internet səhifəsində istehlakçılar qeydiyyatdan keçməklə şəxsi kabinetlərini yarada, elektron bildiriş sistemlərindən istifadə edə bilərlər.
“İnnovativ proseslərin geniş vüsət aldığı dövrdə demək olar ki hər bir istehlakçının tətbiq ediləcək yeni bildiriş üsullarından istifadə imkanına malik olmasına əsasən söyləyə bilərik ki, edilmiş dəyişikliklər enerji təchizatı müəssisəsi ilə yanaşı istehlakçı maraqlarına da xidmət edən bir qərardır. Artıq hər bir istehlakçı mobil nömrə və elektron poçt ünvanını göstərməklə enerji təchizatı müəssisə ilə hesablaşmalarında onlayn məlumatlı olacaq, aylıq borc məbləğlərinə daha rahat nəzarət edə biləcək. Onlayn ödəmələrin aparılması bu gün təmasın minimuma endirilməsi üçün önəmli bir layihədir, bu “Azərişıq” tərəfindən tətbiq olunurdu. Lakin daha da təkmilləşdirilmə aparıldı. Belə ki, xüsusi karantin dövründə ödəmə məntəqələrinin və müxtəlif ödəniş şirkətlərinə aid terminalların bağlı olması səbəbi ilə istehlakçılarımızın smart kart sayğaclarının balansının artırılması problemi yaranmışdır. Artıq yeni layihədə bu problem aradan qaldırılacaq. Belə ki, istehlakçılarımız sadə bir qurğu əldə etməklə evdən internet vasitəsilə smart kart sayğac balansını artıra biləcəklər”, - deyə Q.Həmidov vurğulayıb.
Bölmənin digər xəbərləri
