“AZERONLİNE” MMC İLƏ DİGƏR İNTERNET PROVAYDERLƏRİNİN MÜBAHİSƏSİNƏ SON QOYULDU
Departamentin direktoru Rəhim Hüseynov məlumat vermişdir ki, başçılıq etdiyi qurum ötən ilin noyabrında internet provayderləri arasında yaranmış mübahisəli məsələni araşdırmağa başlamışdır. Müvafiq komissiya aydınlaşdırmışdır ki, “Azeronline” MMC internet xidməti göstərərkən reklamlarında və tarif cədvəllərində mobil rabitə operatoru “Azercell Telekom” müəssisəsinə məxsus tanınmış “Sim-Sim” əmtəə nişanından istifadə edir, müəyyən xidmət kartları ilə birlikdə “Sim-Sim” danışıq kartları hədiyyə verir. Bu isə digər internet provayderlərinin narazılığına səbəb olmuş və 14 provayder tərəfindən “Azeronline”nin İP ünvanlarına gediş və gəliş trafiklərinə qadağa qoyulması barədə qərar qəbul edilmişdir.
Departamentin antiinhisar qanunvericiliyinin pozulması haqqında işlərə baxılması üzrə komissiyası araşdırmalardan sonra “Azeronline”yə “Sim-Sim” əmtəə nişanından istifadəni dayndırmağı, digər internet provayderlərinə isə “Azeronline”yə qarşı qoyulmuş qadağaları aradan qaldırmağı tövsiyə etmişdir. Hər iki tərəf tövsiyəni yerinə yetirir.
“Azeronline” MMC-nin rəhbəri Elçin Atakişiyev və “İntrans” şirkətinin rəhbəri, iddia irəli sürmüş internet provayderlərinin təmsilçisi Faiq Fərmanov komissiyanın qərarına bundan sonra da hörmətlə yanaşacaqlarını bildirmişlər.
Sonda jurnalistləri maraqlandıran suallara cavab verilmişdir.
Bölmənin digər xəbərləri
