“AZƏRREYL” ÇEMPİONLAR LİQASININ NÖVBƏTİ MƏRHƏLƏSİNƏ ÇIXMIŞDIR

05.02.2004 [00:47]
Çap et
A⁺ A^-

Fevralın 4-də Bakı İdman Sarayında qadın voleybolçular arasında Çempionlar liqası qrup turnirinin dördüncü, yekun görüşündə “Azərreyl” komandası İspaniyanın “Otel Kantur” klubu ilə qarşılaşmışdır. Xatırladaq ki, İspaniyada birinci oyunda Azərbaycan voleybolçuları 3:0 hesabı ilə inamlı qələbə qazanmışdılar.

Meydança sahibləri ilk dəqiqələrdən təşəbbüsə yiyələnərək, hesabda irəli çıxdılar. Lakin hissənin ortalarına yaxın ispaniyalılar hesabı bərabərləşdirdilər və mübarizə gərginləşdi. Buna baxmayaraq, “Azərreyl” müdafiədə daha mütəşəkkil oynayaraq, birinci hissəni qələbə ilə başa çatdırdı – 31:29.

İkinci hissədə də vəziyyət dəyişmədi və voleybolçularımız yalnız hissənin sonuna yaxın irəli çıxaraq, iki top üstünlüyü ilə qalib gəldilər – 25:23. Üçüncü hissə də idmançılarımızın üstünlüyü ilə keçdi – 25:18. Beləliklə, ümumi hesab Azərbaycan komandasının xeyrinə oldu – 3:0.

“Azərreyl” turnirin bu mərhələsində keçirdiyi dörd oyunun hamısında 3:0 hesabı ilə qalib gəlmişdir.

Beləliklə, Azərbaycan idmançıları Çempionlar liqasının növbəti mərhələsinə çıxdılar.