“AZTELEKOM”DA ŞƏHİDLƏRİN XATİRƏSİ ANILMIŞDIR
Bakı, 19 yanvar (AZƏRTAC). Rabitə və İnformasiya Texnologiyaları Nazirliyinin “Aztelekom” İstehsalat Birliyində 20 Yanvar qırğını ilə bağlı anım mərasimi keçirilmişdir.
Əvvəlcə bu qanlı faciə ilə əlaqədar sənədli kadrlar nümayiş etdirilmiş və şəhidlik zirvəsinə ucalmış Vətən övladlarının əziz xatirəsi bir dəqiqəlik sükutla yad olunmuşdur.
Birliyin baş direktoru Məhəmməd Məmmədov yanvar hadisələrinin ağır nəticələrindən danışmışdır. Bildirmişdir ki, sovet hakimiyyəti bu cinayətlə Ermənistan separatçılarına dəstək vermiş, nəticədə Azərbaycana qarşı həyata keçirilən uzunmüddətli erməni təcavüzü baş vermişdir. Sovet hərbi birləşmələrinin misli görünməmiş qəddarlığı bu yolda şəhidlər verən xalqımızı öz iradəsindən döndərə bilməmişdir.
M.Məmmədov tariximizin faciəli, həm də qəhrəmanlıq səhifəsinə çevrilmiş Qanlı Yanvar hadisələrinin mahiyyətini açıqlamış, məhz ümummilli lider Heydər Əliyevin təşəbbüsü ilə ilk dəfə bu qırğına siyasi-hüquqi qiymət verildiyini diqqətə çatdırmışdır.
Mərasimdə vurğulanmışdır ki, xalqımıza zaman-zaman üz vermiş faciələri unutmağa mənəvi haqqımız yoxdur və qəhrəmanlıq örnəyi olan 20 Yanvar hadisələri millətimizin qan yaddaşına əbədi həkk olunmalıdır.
Bölmənin digər xəbərləri
