AzTV-nin VERİLİŞLƏRİNİN GÜRCÜSTANDA YAYIMLANMASI GENİŞLƏNİR
Son illər Azərbaycan dövlət televiziyası verilişlərinin Gürcüstanda, bu ölkənin televiziya verilişlərinin isə respublikamızda yayımlanması genişlənmişdir. Bu, dövlətlərimizin başçılarının ölkələrimiz və xalqlarımız arasında dostluğun daha da möhkəmlənməsinə yönəldilmiş siyasətinin uğurla həyata keçirilməsi sayəsində mümkün olmuşdur.
Azərbaycan Rabitə Nazirliyi və Gürcüstan Nəqliyyat və Kommunikasiya Nazirliyi bu müvəffəqiyyətlə kifayətlənməyərək, televiziyalarımızın verilişlərinin yayım dairəsini daha da genişləndirmək üçün yeni birgə layihə hazırlamış və yüksək səviyyədə həyata keçirmişlər. Həmin layihədə nəzərdə tutulduğu kimi, bu günlərdə Dmanisi rayonundakı Hamamlı kəndində retranslyasiya qülləsi istifadəyə verilmişdir. Xaricdə istehsal olunmuş müasir aparatlar quraşdırılan bu qüllə AzTV-nin birinci proqramının verilişlərini bütün Dmanisi bölgəsində keyfiyyətlə yayımlamağa imkan yaradır.
Gürcüstanın nəqliyyat və kommunikasiya naziri Merab Adeişvili AZƏRTAC-ın müxbiri ilə müsahibəsində demişdir: “Əvvəllər Azərbaycan televiziyasının verilişlərinə ancaq Marneuli və Qardabani rayonlarında baxırdılar. Lakin Azərbaycanın Rabitə Nazirliyi ilə əməkdaşlığımız sayəsində AzTV-nin verilişləri indi nəinki bütün Şərqi Gürcüstanda, hətta Tbilisidən qərbdəki bəzi rayonlarda da maneəsiz yayımlanır və bu, Azərbaycan haqqında doğru-düzgün məlumatı ən etibarlı mənbədən almağa imkan verir. Biz digər sahələrdə olduğu kimi, bu sahədə də əməkdaşlığımızı bundan sonra da davam etdirəcəyik”.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
