“Bacım oğluna deyərsən ki, dayın qəhrəmandır...” VİDEO
Tovuz, 7 oktyabr, Ruslan Novruzoğlu, AZƏRTAC
Otuz il işğal altında qalan torpaqlarımızın azad olunması uğrunda başlayan Vətən müharibəsində canından keçərək şəhidlik zirvəsinə yüksələn igidlərimizdən biri də Elmar Cəbrayıl oğlu Şirinovdur.
AZƏRTAC-ın bölgə müxbiri xəbər verir ki, Elmar 2002-ci il martın 9-da Tovuz rayonunun Xatınlı kəndində dünyaya gəlib. O, uşaqlıqdan hərbçi olmaq arzusu ilə yaşayıb. 2020-ci ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin “N” saylı hərbi hissəsində xidmət edib. Azərbaycan Silahlı Qüvvələrinin əsgəri olan E.Şirinov 2020-ci il sentyabrın 27-də başlayan Vətən müharibəsində Murovdağ, Füzuli, Cəbrayıl, Xocavənd, Hadrut, Qubadlı, Zəngilan və Şuşanın azadlığı uğrunda gedən döyüşlərdə qəhrəmanlığı ilə fərqlənib. Son döyüşü isə Şuşa uğrunda olub.
Elmar altı aylıq olanda atasız qalıb. Hələ orta məktəb illərindən anasına, bacısına kömək edib. Yaşı az olsa da, çoxlu dost qazanan Elmar hətta, özündən böyük insanlarla da dostluq edib. Zəhmətkeşliyi ilə seçilib. Anası Amana Nəsirova deyir ki, oğlu hərbi xidmətdə olduğu zaman Tovuz döyüşlərində Polad Həşimovun və digər hərbçilərimizin şəhid olması xəbəri ona pis təsir etmişdi. Hər telefon danışığında “Ana mən şəhidlərimizin qisasını alacağam”, - deyərdi.
Ailəsi 2020-ci il sentyabrın 27-də başlayan Vətən müharibəsində Elmarın döyüşlərdə iştirak etməsindən xəbərsiz olub. O, bu barədə yalnız bir müddət sonra ailəsinə xəbər verib, torpaqlarımızın bir hissəsinin azad olunduğunu söyləyib. “Böyük Qələbəmizə az qalıb. Narahat olma, ola bilsin, 4-5 gün sənə zəng vurmayım”, - deyə anasına bildirib.
Elmarın şəhid olması xəbərini anası Şuşanın azad olunmasından sonra eşidin. “Şəhadətindən sonra onun haqqında xoş xatirələr eşitdim. Onun son döyüşdüyü, şəhid olduğu yer İsa bulağının 500 metr yaxınlığında, meşədə olub. 18 yaşında şəhadətə yüksəldi. Onun şəhidliyi ilə qürur duyuram. Fəxr edirəm ki, Elmar kimi oğul böyütmüşəm. Elmar hərbi xidmətə gedəndə bacısı oğluna deyib ki, “anamı, bacımı sənə əmanət edirəm, ay Turqut”. Sonuncu dəfə mənimlə telefonla danışanda dedi ki, “Turqutu gətir yanında saxla və ona həmişə deyərsən ki, dayın qəhrəmandır...”. Elə dediyi kimi də oldu”.
Şəhid Elmar Şirinov ölümündən sonra “Kəlbəcərin azad olunmasına görə”, “Xocavəndin azad olunmasına görə”, “Cəbrayılın azad olunmasına görə”, “Şuşanın azad olunmasına görə”, “Vətən uğrunda”, “Cəsur döyüşçü”, “Şücaətə görə” medalları və “Azərbaycan Bayrağı” ordeni ilə təltif olunub.
Bölmənin digər xəbərləri
