BAKI DÖVLƏT UNİVERSİTETİNDƏ İMMUNOLOGİYA LABORATORİYASININ AÇILIŞI OLMUŞDUR
AZƏRTAC-ın müxbiri xəbər verir ki, laboratoriyanın açılış mərasimində Böyük Britaniya, İtaliya, Gürcüstan universitet və tədqiqat institutlarından tanınmış alim və mütəxəssislər də iştirak etmişlər.
BDU-nun rektoru, AMEA-nın müxbir üzvü professor Abel Məhərrəmov çıxış edərək bu ali təhsil müəssisəsinin son 10 ildə çoxlu beynəlxalq proqramlarda iştirak etdiyini diqqətə çatdırmış və həyata keçirilən proqramların tərəfdaş universitetlər arasında əlaqələri daha da genişləndirəcəyinə əmin olduğunu bildirmişdir.
Ölkəmizdə immunologiya elminin və təhsilinin inkişafında yeni laboratoriyadan geniş istifadə olunacağını diqqətə çatdıran rektor, alimlərə və mütəxəssislərə yeni nailiyyətlər arzulamışdır.
London Kollec Universitetinin professoru Piter Lidyard, BDU-nun biokimya və biotexnologiya kafedrasının müdiri Akif Quliyev tədris və tədqiqat işlərinin aparılmasında laboratoriyanın müstəsna əhəmiyyətini vurğulamışlar.
Sonra ingiltərəli və gürcüstanlı alimlər biologiya fakültəsinin professor-müəllim heyəti və magistrantları qarşısında immunologiyanın problemləri və tədrisi ilə bağlı maraqlı mühazirələrlə çıxış etmişlər.
Tədbirin iştirakçıları, həmçinin universitetin ayrı-ayrı laboratoriyaları ilə tanış olmuş, yeni proqramlar haqqında fikir mübadiləsi aparmışlar.
Bölmənin digər xəbərləri
