BAKI VƏ XƏZƏRYANI BÖLGƏ YEPARXİYASININ YEPİSKOPU ALEKSANDR HƏZRƏTLƏRİNİN ÇIXIŞI
- Zati-aliləri, möhtərəm cənab Prezident!
Hörmətli qonaqlar, bugünkü təntənənin iştirakçıları!
Hörmətli cənab Prezident, Azərbaycanın pravoslav kilsəsinin, pravoslav ruhanilərinin, pravoslav möminlərinin əməyinə Sizin mükafatınızda öz ifadəsini tapmış yüksək qiymətdən çox mütəəssir oldum.
Hörmətli Heydər Əliyeviç, əgər Siz 1993-cü ildə dəhşətli siyasi, iqtisadi böhran, vətəndaş böhranı keçirən Azərbaycan Respublikasına rəhbərlik etməyə başlamasaydınız, bugünkü bayram, bugünkü təntənəli açılış da mümkün olmazdı. Biz bu illər ərzində Azərbaycanımızda həyatın nə qədər heyrətamiz dərəcədə dəyişdiyini görürük. Ailələrə, evlərə qayıtmağa başlayan sakitlik, sülh, əmin-amanlıq - bütün bunlar suveren Azərbaycanda güzəranın yaxşılaşdırılması sahəsində Sizin gördüyünüz çox böyük işlərə sübutdur.
Öz tarixində başına, həqiqətən, çox müsibətlər gəlmiş bu məbəd isə buraya toplaşanların gözləri qarşısında, yəqin ki, keçmiş gözəlliyi ilə deyil, daha böyük əzəmətlə ucalır. Ən başlıcası isə budur ki, bu məbədin dirçəldilməsi üçün hamı səy göstərmişdir, lakin azərbaycanlılar, xüsusən də, burada iştirak edən cənab Aydın Qurbanov daha böyük səylər göstərmişlər. O, bizim bu gün buraya toplaşa bilməyimiz üçün əlindən gələni əsirgəməmişdir. Hörmətli cənab Prezident, bütün bunlar sübut edir ki, Sizin dönmədən həyata keçirdiyiniz siyasi xətt düzgün, zəruri xətdir, Azərbaycanı çiçəklənməyə, firavanlığa və beynəlxalq aləmdə tanınmağa doğru aparan xətdir.
Elə bugünkü şənlik də bir daha sübut edir ki, Azərbaycan xalqına əzəldən xas olan, lakin inkişafına Sizin böyük təkan verdiyiniz dini dözümlülük keçmişdəki sarsıntılara Azərbaycanın gələcəkdə bir daha məruz qalmayacağına təminatdır. Ümidvarıq ki, Azərbaycanın ətrafında cərəyan edən bütün hadisələr bizdən yan keçəcək və biz Azərbaycanın tarixin özü tərəfindən ona ayrılmış layiqli yeri tutması - Şərqlə Qərbin qovuşuğunda olması üçün qətiyyətlə və dönmədən irəliləyəcəyik. Burada deyildiyi kimi, bütün ibadətgahlarda - məscidlərdə, sinaqoqlarda, pravoslav məbədlərində Azərbaycanın əmin-amanlığı və tərəqqisi üçün, ilk növbədə, Azərbaycan Respublikasının rəhbəri, Prezident cənab Heydər Əliyevin sağlığına dualar oxunur.
Çox hörmətli cənab Prezident, icazə verin, dini adətimizə uyğun olaraq, Sizə möhkəm cansağlığı, möhkəm iradə, müdriklik, böyük səbr və uzun illər firavan həyat arzulayım.
X x x
Kilsə xorunun ifasında Azərbaycan dövləti başçısının və Azərbaycan xalqının şərəfinə nəğmə səsləndi. Yepiskop Aleksandr həzrətləri Prezident Heydər Əliyevə baş kafedral kilsənin maketini, məbədə həsr olunmuş fotoalbom, habelə Rus Pravoslav Kilsəsinin tarixi haqqında kitab təqdim etdi.
X x x
Mərasimdə Milli Məclisin sədri Murtuz Ələsgərov, Prezidentin Katibliyinin rəisi Dilarə Seyidzadə, Bakı Şəhər İcra Hakimiyyətinin başçısı Hacıbala Abutalıbov, parlamentin deputatları, bir sıra ölkələrin səfirləri, Ümumrusiya Azərbaycan Konqresi rəhbərliyinin və respublika ictimaiyyətinin nümayəndələri iştirak edirdilər.
Foto Yaşar Xəlilovundur
Bölmənin digər xəbərləri
