Bakıda atmosfer havasında dəm qazının miqdarı normanı 12 dəfədən çox keçib
Bakı, 11 may, AZƏRTAC
Mayın 11-də Ekologiya və Təbii Sərvətlər Nazirliyində son zamanlar havada qaz qarışıqlarının normadan yüksək olmasına və atmosfer havasının monitorinqinə dair mətbuat konfransı keçirilib.
AZƏRTAC xəbər verir ki, nazirliyin mətbuat xidmətinin rəhbəri İradə İbrahimova ictimai-iaşə obyektlərinin fəaliyyəti zamanı ayrılan tüstünün, qazların və iy-qoxunun yayılması nəticəsində atmosfer havasının zərərli maddələrin təsirinə məruz qaldığını, bunun isə insanlara mənfi təsir etdiyini bildirib. Qeyd edilib ki, bununla bağlı vətəndaşlardan nazirliyə çoxsaylı müraciətlər daxil olub və araşdırma komissiyası fəaliyyətə başlayıb.
Nazirliyin Ətraf Mühit üzrə Milli Monitorinq Departamentinin direktor müavini Mətanət Avazova qurumun atmosferin mühafizəsi sahəsində gördüyü işlərdən və aparılan monitorinqlərdən danışıb. Direktor müavini əvvəlki günlərlə müqayisədə, xüsusilə mayın 4-8-i arasında Bakı şəhərinin bəzi ərazilərində müşayiət olunan qoxunun azaldığını diqqətə çatdırıb. Bildirib ki, bu, görülən tədbirlərin bariz nümunəsidir və monitorinqlər zərərli maddələrin miqdarı normaya düşənə qədər davam etdiriləcək.
Ekoloji təbliğat şöbəsinin ictimaiyyətlə əlaqələr və təbliğat sektorunun müdiri Umayra Tağıyeva ətraf mühitə ziyan vuran fəaliyyətin qanunvericiliyə zidd olduğunu və atmosferə atılan tullantıların azaldılması məqsədilə müasir standartlara cavab verən qurğu və avadanlıqların quraşdırılmasının, texnoloji proseslərin təkmilləşdirilməsinin vacibliyini söyləyib.
Ətraf Mühitin Mühafizəsi Departamentinin əməkdaşı Kənan Kərimli qanunvericiliyin tələblərini pozan iaşə sahiblərinə qarşı İnzibati Xətalar Məcəlləsinin 237.2-ci maddəsinə uyğun olaraq tədbirlər görüləcəyini diqqətə çatdırıb. Bildirib ki, ətraf mühitə buraxılan tullantıların qarşısını almaq üçün xüsusi qurğular - filtrlər quraşdırmayan fiziki şəxslər 600 manatdan 25 min manatadək, hüquqi şəxslər 20-25 min manat cərimələnəcəklər. K.Kərimli iaşə obyektlərində müasir standartlara cavab verən qurğu və avadanlıqların quraşdırılması, atmosferə atılan tullantıların azaldılması məqsədilə yerli icra hakimiyyətlərinə və iaşə obyektlərinin sahiblərinə müvafiq məktublar göndərildiyini vurğulayıb.
Ətraf Mühit üzrə Milli Monitorinq Departamentinin mütəxəssisi Cəlair Səmədov komissiya tərəfindən Bakı şəhərinin inzibati rayonlarında yerləşən şadlıq evlərinin və digər ictimai-iaşə obyektlərinin fəaliyyət göstərdiyi müddətdə onların ətraf ərazilərində monitorinqlər aparıldığını, atmosfer havasında zərərli qaz birləşmələrinin miqdarının ölçülməsi məqsədilə hava nümunələri götürüldüyünü deyib. “Nümunələr üzərində aparılmış fiziki-kimyəvi analizlərin nəticələri göstərib ki, atmosferə atılan zərərli qaz birləşmələrinin miqdarı yol verilən qatılıq həddindən dəfələrlə artıqdır. Belə ki, dəm qazının - karbon-monooksidin miqdarı normadan 12, kükürd dörd oksidin miqdarı isə 4 dəfədən çox olub. Bu da insanlarda diskomfort yaradır, onların sağlamlığına mənfi təsir göstərir”, - deyə C.Səmədov diqqətə çatdırıb.
Ətraf mühit üzrə Milli Monitorinq Departamentinin mütəxəssisi Mirsalam Qəmbərov ötən həftə paytaxtın Sabunçu, Xətai, Səbail və bir sıra ərazilərdə atmosferdə kəskin qoxu müşahidə edildiyini və bununla bağlı müvafiq təşkilatlara xəbərdarlıq olunduğunu deyib. Mütəxəssis Bakının dörd yerində atmosfer havasında zərərli maddələrin miqdarının normadan dəfələrlə çox olduğunu və daha kəskin qoxu yayıldığını da vurğulayıb. Bildirib ki, həmin ərazilər neft emalı zavodu və onun əhatə dairəsinə aiddir. Havanın isti keçməsi və rütubətin normaya uyğun olmaması səbəbindən həmin maddələr daha çox yayılıb. “İstehsalçı müəssisələr atmosferə atılan tullantıların zərərsiz olması üçün bütün lazımi tədbirlər görməkdə öhdəlik daşıyırlar. Qanunvericiliyin tələbi pozularsa, qanunauyğun tədbirlər görülməlidir. Buna uyğun protokol tərtib edilib, həmçinin işçi qrupumuz hazırda pis qoxu yayılan ərazilərdə ətraf mühitə vurulan ziyanı hesablayır. Yaxın günlərdə rəqəmlər açıqlanacaq”, - deyə M.Qəmbərov qeyd edib.
Mətbuat konfransında sahibkarlara və ictimai iaşə-obyektlərinin sahiblərinə ekoloji qanunvericiliyin tələblərinə əməl etmək, ətraf mühitə ziyan vurmamaq, tullantıların və kəskin qoxuların qarşısının alınması üçün filtrlər, müasir avadanlıqlar quraşdırmaq tövsiyə olunub.
Bölmənin digər xəbərləri
