Bakıda “İctimai sektorda qadınlar və müasir çağırışlar” adlı konfrans təşkil edilib - YENİLƏNİB
Bakı, 28 fevral, AZƏRTAC
Fevralın 28-də Bakıda Ailə, Qadın və Uşaq Problemləri üzrə Dövlət Komitəsinin təşkilatçılığı ilə “İctimai sektorda qadınlar və müasir çağırışlar” adlı konfrans keçirilib.
AZƏRTAC xəbər verir ki, tədbirdə Milli Məclisin deputatları, vətəndaş cəmiyyətinin nümayəndələri iştirak ediblər. Tədbirin məqsədi vətəndaş cəmiyyəti nümayəndələrinin ölkənin ictimai proseslərində iştirakının təşviqi, eyni zamanda, onların bu istiqamətdə fəallığının gücləndirilməsidir.
Konfransda “Zəngəzurun tarixi-etnoqrafik təsviri və gender məsələləri”, “Qərbi Azərbaycanın tarixi memarlıq irsi”, “Qərbi Azərbaycana Qayıdış: vətəndaş cəmiyyətinin vəzifələri”, “Orta dəhliz: regionda sülh” mövzularında çıxışlar dinləniləcək, mövzular ətrafında müzakirələr aparılıb.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova qarşımızda dayanan əsas məqsədin Azərbaycanın bütün ərazilərində suveren hüquqlarımızın təmin edilməsi olduğunu vurğulayıb: "Bu prosesdə hər kəsin töhfəsi olmalıdır. Qarabağ məsələsində hər birimiz yumruğa çevrilə bildiksə, tarixi torpaqlarımıza qayıdış prosesi də bu cür reallaşacaq. Artıq Xankəndi-Laçın yolunda uzun müddətdir ki, aksiya davam edir. Hazırda ekofəallarımız da həqiqətləri dünyaya çatdırırlar”, - deyə B.Muradova əlavə edib.
İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı çıxışında Qərbi Azərbaycana qayıdış prosesində müharibə yolunu deyil, sülh yolunu seçdiyimizi vurğulayıb: “Azərbaycan dövləti Laçın-Xankəndi yoluna qayıdıb və biz bu yoldan dönməyəcəyik. Biz Qərbi Azərbaycana qayıdışımızda müharibə yolunu deyil, sülh yolunu seçirik. Biz heç kimlə müharibə başlayan tərəf olmamışıq, daim sülhü seçmişik. Ümid edirəm ki, Ermənistan dövləti də nə vaxtsa bu yolu tutacaq".
Digər çıxış edənlər bildiriblər ki, qadınların müxtəlif sahələrdə təmsilçiliyinin təşviqi vacibdir və Azərbaycan hökuməti bunu öz gündəliyində də prioritet hesab edir. Azərbaycan 30 illik münaqişədə böyük itkilər verib və bu dövrdə azərbaycanlı qadınların hüquqları pozulub.
Bölmənin digər xəbərləri
