BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 10 yanvar, (AZƏRTAC). AZƏRTAC xəbər verir ki, yanvarın 10-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy və digər rayonlardan 17 tondan çox müxtəlif çeşidli kənd təsərrüfatı məhsulu gətirilmişdi. Burada yumurtanın biri 10, almanın kiloqramı 30-80, xurma 50-80, qoyun əti 4 manat 50, mal əti 4 manat 20 qəpiyə, quş əti 3 manat 60-3 manat 80 qəpiyə satılırdı. Gədəbəyli Məlik Əliyev həyətyanı təsərrüfatında becərdiyi 4 tondan çox kələmi, kartofu, kök və soğanı münasib qiymətə təklif edirdi. Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, məhsulların qiyməti bazardakından 20-25 faizə qədər ucuzdur.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkada satışa Quba, Qusar, Salyan, Dəvəçi, Astara, İmişli və digər rayonlardan gətirilmiş 69,5 ton meyvə-tərəvəz, ət və süd məhsulları çıxarılmışdı. 2009-cu ilin sayca ikinci yarmarkasına gətirilən məhsullar arasında kartof, soğan, yerkökü, kələm, balqabaq, ət, süd məhsulları, göyərti, habelə istixana şəraitində yetişdirilmiş pomidor, xiyar və s. çoxluq təşkil edirdi. Bəzi məhsulların qiyməti bazarlarla müqayisədə 40-50 faiz asağı idi.
Yarmarkadan əlidolu çıxan paytaxt sakinləri burada yaradılan şəraitdən, xüsusilə məhsulun bolluğundan və qiymətlərin münasibliyindən razılıqlarını bildirirdilər.
Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Masallı və digər rayonlardan 11 tona yaxın meyvə-tərəvəz, ət və süd məhsulları gətirilmişdi. Masallıdan gəlmiş Kazım Məmmədov paytaxt sakinlərinə 5 tondan çox kartof, kələm, meyvə, bal və pendir təklif edirdi. Fermer balın kiloqramını 10 manata, kartofu, kələmi 30-50 qəpiyə satırdı.
Suraxanıda “Günəş” ticarət mərkəzindəki yarmarkada Gədəbəy, Samux, Daşkəsən, Quba, Biləsuvar rayonlarının fermerləri satışa 44 tondan çox məhsul çıxarmışdılar. “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri sakinlərə 6 tondan çox məhsul təklif edirdilər. Kənd Təsərrüfatı Nazirliyinin nümayəndəsi Mustafa Rüstəmov demişdir ki, Daşkəsən, Cəlilabad və Samux rayonları fermerlərinin məhsulları alıcıları daha çox cəlb edir.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada şəhər sakinləri qiymətləri bazardakından xeyli ucuz olan almanı, narıngini, kələmi, kartofu və digər məhsulları həvəslə alırdılar. Kənd Təsərrüfatı Nazirliyinin nümayəndəsi Namiq Qüdrətovun verdiyi məlumata görə, Qəbələ, Qax, Ağcabədi, Biləsuvar, Quba, Salyan, Kürdəmir, Şəmkir və Şəki rayonlarının fermerləri satışa 230 tondan çox məhsul çıxarmışlar.
Şəkidən gəlmiş Anar Məmmədov 200 kiloqram pendir və 2 ton xiyar gətirmişdir. Dediyinə görə, iki ildən çoxdur ki, yarmarkaya gəlir. Artıq alıcıların bir çoxu ilə dostlaşıb. Həmişə də qiyməti insafla təyin edir. Bu gün pendirin kiloqramını 2 manat 60 qəpiyə, xiyarı isə 50 qəpiyə satır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Qazax Rayon İcra Hakimiyyətinin nümayəndəsi İman Məmmədov bildirmişdir ki, rayonun fermerləri alıcılara 2,4 ton tərəvəz, 2,7 ton meyvə, 5,1 ton kartof və süd məhsulları təklif edirlər. Ucuz qiymətlərə təklif olunan alma, soğan, kələm, nar, kök və digər məhsulların alıcıları çox idi.
Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, yarmarkaya Qazax və Ağsudan 19,2 ton meyvə-tərəvəz, süd və bostan məhsulları gətirilmişdir.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Goranboy, Ağstafa və Bərdə fermerləri satışa bazardakından 20-25 faiz ucuz qiymətlərə müxtəlif çeşiddə kənd təsərrüfatı məhsulları çıxarmışdılar.
Kənd Təsərrüfatı Nazirliyinin nümayəndəsi Savalan Seyfəddinov bildirmişdir ki, Nərimanov rayonunun Ə.Əliyev küçəsindəki yarmarkada Xaçmaz, İmişli, Tərtər, Tovuz, Oğuz, Astara rayonlarının fermerləri paytaxt sakinlərinə 40,5 ton kənd təsərrüfatı məhsulları təklif etmişlər.
İmişli rayonunun Qaralar kənd sakini Kamran Qurbanov öz fermer təsərrüfatından 4 tona yaxın kartof, soğan gətirmişdi. O bildirmişdir ki, fermerlərə yaradılan əlverişli şərait onun ürəyincədir.
Qiymətlərin bazardakından 30-35 faizə qədər ucuz olması alıcıların yarmarkaya axınını artırmışdı. Onlar meyvə-tərəvəzin, meyvə qurusunun, ət-süd məmulatlarının və konservləşdirilmiş məhsulların keyfiyyətindən razılıqlarını bildirirdilər.
######
Bölmənin digər xəbərləri
