Bakıda NATO nümayəndələrinin iştirakı ilə beynəlxalq konfrans keçirilib
Bakı, 19 mart, K.Əliyeva, T.Ağayeva, AZƏRTAC
Martın 19-da Bakıda “NATO-nun Uels sammitindən sonra Şimali Atlantika İttifaqı və tərəfdaş ölkələr arasında əməkdaşlıq” mövzusunda beynəlxalq konfrans keçirilib.
AZƏRTAC xəbər verir ki, tədbir Azərbaycan Milli Elmlər Akademiyasının (AMEA) İnsan Hüquqları İnstitutu, NATO-nun Azərbaycandakı nümayəndəliyi və Rumıniyanın ölkəmizdəki səfirliyinin birgə təşkilatçılığı ilə reallaşdırılıb.
Konfransda İnsan Hüquqları İnstitutunun direktoru, Milli Məclisin deputatı Aytən Mustafayeva Azərbaycanın beynəlxalq təşkilatlara inteqrasiyasından, Cənubi Qafqaz geostrateji məkanındakı dövlətlərin təhlükəsizlik problemlərindən və bu regionun Şimali Atlantika təşkilatı üçün rolundan danışıb.
Rumıniyanın ölkəmizdəki səfiri Daniel Kristian Çiobanu ölkəsinin Azərbaycanın müstəqilliyini ilk tanıyan dövlətlərdən biri olduğunu, Azərbaycanı Şimali Atlantika Alyansı üçün vacib və dəyərli tərəfdaş hesab etdiyini vurğulayıb.
Diplomat bildirib ki, NATO ilə Azərbaycan arasında strateji əhəmiyyət daşıyan əlaqələr sürətlə inkişaf edir. NATO və Avropa İttifaqının üzvü olan Rumıniya Azərbaycanın Avropa və Avratlantik institutlarla əməkdaşlığının inkişafı istiqamətindəki səylərini fəal dəstəkləməkdə davam edəcək.
NATO-nun baş ofisinin siyasi məsələlər və təhlükəsizlik şöbəsinin müdiri Steffen Elgersma “Müasir dünyada Azərbaycan-NATO əlaqələri” mövzusunda məruzəsində Azərbaycan ilə NATO arasında əlaqələrin getdikcə gücləndiyini qeyd edib. Bildirib ki, NATO-nun Əfqanıstanda keçirdiyi əməliyyatlarda Azərbaycanın töhfələri tərəfdaşlıq sahəsində vacib aspektlərdəndir. Azərbaycanın sülhməramlı qüvvələrinin NATO-nun standartlarına uyğunlaşdırılması, müdafiə sahəsində təhsilin təkmilləşdirilməsi də mühüm məsələlərdəndir. S.Elgersma NATO ilə əməkdaşlıq çərçivəsində Azərbaycanda həyata keçirilən layihələrin əhəmiyyətini xüsusi vurğulayıb.
NATO-nun Cənubi Qafqaz üzrə əlaqələndirici zabiti Vilyam Lahue Gürcüstanda yaradılacaq təlim-qiymətləndirmə mərkəzinin Azərbaycan üçün də yeni əməkdaşlıq imkanları yaradacağını bildirib. O əlavə edib ki, Azərbaycan təlimlərdə iştirak etmək üçün öz hərbçilərini oraya göndərə biləcək.
Böyük Britaniyanın Azərbaycandakı səfiri İrfan Siddiq Uelsin NATO-nun sonuncu sammitinə ev sahibliyi etdiyini xatırladıb, sammitin əsas nəticələrini diqqətə çatdırıb. Diplomat qeyd edib ki, tərəflər 2016-cı ildə Varşavada keçiriləcək növbəti sammitə kimi qarşıya qoyulan məqsəd və vəzifələrin yerinə yetirilməsinə çalışmalıdır.
Tədbirdə daha sonra Xarici İşlər Nazirliyinin sülh naminə tərəfdaşlıq şöbəsinin rəhbəri Esmira Cəfərovanın “Azərbaycan-NATO tərəfdaşlıq perspektivləri”, Müdafiə Nazirliyinin Beynəlxalq Hərbi Əməkdaşlıq İdarəsinin rəisi, general-mayor Hüseyn Mahmudovun “Uels Sammitindən sonrakı dövrdə Azərbaycanla NATO arasında hərbi əməkdaşlıq”, Daxili İşlər Nazirliyinin Polis Akademiyasının polkovnik-leytenantı Vasif Nəcəfov isə “Uels sammitinin Əfqanıstan üzrə bəyannaməsinin həyata keçirilməsi xüsusiyyətləri” və digər mövzularda məruzələr dinlənilib, müzakirələr aparılıb.
Azərbaycan, NATO və tərəfdaş ölkələr arasında əməkdaşlığın bir sıra aspektləri ətrafında geniş fikir mübadiləsi aparılıb, iştirakçılar məsələ ilə bağlı təklif və mülahizələrini bildiriblər.
Sonda A.Mustafayeva Azərbaycanın hazırda NATO ilə sıx əməkdaşlıq etdiyini, Şimali Atlantika İttifaqı və tərəfdaş ölkələrin əməkdaşlığının Azərbaycan üçün səmərəli və məhsuldar olacağına, ölkələr arasındakı tərəfdaşlıq potensialının daha da gücləndiriləcəyinə ümidvar olduğunu bildirib.
Bölmənin digər xəbərləri
