BAKIDA RUSİYA FEDERASİYASININ MƏDƏNİYYƏT GÜNLƏRİ KEÇİRİLƏCƏK
Aprelin 22-də Bakıda Rusiya Federasiyasının Mədəniyyət günləri başlanır. Günlərin açılışı “Respublika” sarayında olacaqdır. Bu dəfə Azərbaycana Böyük Teatr, Vladimir Fedoseyevin rəhbərliyi ilə P.İ.Çaykovski adına Dövlət Akademik Böyük Simfonik Orkestri, V.F.Komissarjevskaya adına Sankt-Peterburq Akademik Dram Teatrı qonaq gələcəkdir. R.Mustafayev adına Dövlət Təsviri Sənət Muzeyində “Usadba Kuskovo” Dövlət Keramika Muzeyinin fondlarından keramika əsərlərinin sərgisi olacaqdır. Nizami kinoteatrında müasir Rusiya rejissorlarının filmləri nümayiş etdiriləcəkdir. Aprelin 23-də P.İ.Çaykovski adına orkestr Respublika sarayında Azərbaycanın görkəmli bəstəkarı və dirijoru Niyazinin xatirəsinə həsr olunmuş konsert proqramı ilə çıxış edəcəkdir.
Mədəniyyət günləri çərçivəsində M.F.Axundov adına Dövlət Kitabxanasında Azərbaycan və Rusiya şahmatçıları arasında dostluq turniri keçiriləcəkdir.
Bölmənin digər xəbərləri
