“Baku Creative Center”də “İnversiya” mövzusunda müasir incəsənət sərgisi açılacaqdır
Bakı, 18 noyabr (AZƏRTAC). Noyabrın 22-də “Baku Creative Center”də “İnversiya” mövzusunda müasir incəsənət sərgisi açılacaqdır.
“Baku Creative Center”dən AZƏRTAC-a bildirmişlər ki, bu sərgi adi, artıq qəbul olunmuş mövzu, hadisə, problem, hiss və duyğu, hal və durumlara müxtəlif insanların fərqli reaksiyası və yanaşması baxımından yaranan əsərləri əhatə edəcəkdir.
Müasir incəsənətin diapazonunun geniş olması səbəbindən “İnversiya” sərgisinin iştirakçılarının təqdim etdikləri işlər də mövzu, növ, forma və ifadə vasitələrinin müxtəlifliyi ilə seçiləcəkdir. İnsani hisslər, din, tarix, mifologiya, dövrün problemlərinə toxunan mövzuları əhatə edən sərginin ekspozisiyasında 6 əsər yer alacaqdır.
Burada Novruz Məmmədovun, Fərəc Rəhmanovun, Erkin Ələkbərlinin, İslam Həsənəlizadənin, Təkin Əfəndiyevin, Məmməd Rəşidovun əsərləri nümayiş olunacaqdır.
Sərginin kuratoru Fərəh Ələkbərlidir.
Sərgiyə giriş sərbəstdir.
Bölmənin digər xəbərləri
