BALACA RƏSSAMIN UĞURU
Özbəkistan İncəsənət Akademiyasının mərkəzi sərgi salonunda “Mən və mənim anam” mövzusunda keçirilən I Beynəlxalq Uşaq rəsmləri müsabiqəsində Bakıdakı Tofiq İsmayılov adına Uşaq Rəssamlıq Qalereyasında fəaliyyət göstərən studiyanın üzvü Tamara Məmmədova “Anamın arzusu” rəsminə görə xüsusi diploma layiq görülmüşdür.
Bu müsabiqə-sərgiyə dünyanın 26 ölkəsindən 3 minə yaxın əl işi göndərilmişdir. Sərgidə Azərbaycandan Uşaq Rəssamlıq Qalereyasının, İncəsənət gimnaziyasının və Uşaq-Gənclər yaradıcılıq sarayının təsviri sənət studiyalarında məşğul olan 30 uşağın 50 əl işi nümayiş etdirilmiş, müsabiqənin təşkilat komitəsi bu rəsmləri yüksək qiymətləndirmişdir.
Uşaq Rəsmləri Müsabiqəsinin direktoru E.Sarko AZƏRTAC-ın müxbiri ilə söhbətində demişdir:- Rəsmlərə baxdıqca bir daha əmin olursan ki, Azərbaycanda çox güclü rəssamlıq məktəbi var. Mübaliğəsiz demək olar ki, göndərilən rəsmlərin əksəriyyəti diploma layiqdir. Gülnaz Hacıyeva, Orxan Əhmədov, Rəhman Rəhmanov, Lamiyə Məmmədova, Elman Əliyev və başqa uşaqların rəsmləri diqqəti cəlb edir. İstərdik ki, Bakıda keçirilən belə tədbirlərə Özbəkistandan da uşaqlar dəvət edilsin.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
