BALAKƏNDƏ AÇIQ ƏYLƏNCƏLİ FUTBOL MƏKTƏBİNİN TƏLİM-MƏŞQLƏRİ KEÇİRİLMİŞDİR
Açıq Əyləncəli Futbol Məktəbləri Assosiasiyasının xətti ilə Balakəndə 8-12 yaşlı uşaqlar üçün təlim-məşqlər keçirilmişdir. Beşgünlük məşqlərdə 200 nəfərədək uşaq iştirak etmişdir.
Rayon gənclər və idman idarəsindən AZƏRTAC-ın müxbirinə bildirmişlər ki, bu münasibətlə Balakən şəhər stadionunda idman ictimaiyyəti nümayəndələrinin iştirakı ilə keçirilən mərasimdə Açıq Əyləncəli Futbol Məktəbləri Assosiasiyasının Azərbaycan üzrə əlaqələndiricisi Kərim Ağayev bildirmişdir ki, humanitar xarakter daşıyan bu aksiya UEFA-nın dəstəyi ilə Kopenhagen Kəsişən Mədəniyyətlər Assosiasiyası və Norveç Futbol Federasiyasının birgə əməkdaşlığı ilə həyata keçirilir. Dünyanın bir sıra ölkələrində, o cümlədən Azərbaycanda da geniş vüsət alan aksiyanın əsas məqsədi uşaqların futbola marağını artırmaq, eyni zamanda ölkələr və xalqlar arasında dostluq və idman əlaqələrini daha da genişləndirməkdir.
Aksiyanın sonunda təlim-məşqlərdə iştirak edən bütün uşaqlara hədiyyələr, idman geyimləri və ləvazimatı hədiyyə edilmişdir.
Bölmənin digər xəbərləri
