DÜNYA
Balkan regionunda elektrik enerjisinə ən çox vəsaiti Şimali Makedoniya vətəndaşları ödəyiblər
Skopye, 31 oktyabr, AZƏRTAC
Qərbi Balkan regionunda ən bahalı elektrik enerjisindən Şimali Makedoniya vətəndaşları istifadə edib.
AZƏRTAC xəbər verir ki, Avropa Statistika Bürosunun məlumatına görə, cari ilin ilk altı ayında Şimali Makedoniyada istehlakçılar 100 kilovat/saat elektrik enerjisinə 10,53 avro ödəyib. Albaniyada 100 kilovat/saat elektrik enerjisinin dəyəri 10,1 avro, Monteneqroda 9,68 avro, Serbiyada 9,64 avro, Bosniya və Herseqovinada 8,74 avro olub.
Regionda ən ucuz elektrik enerjisi isə 100 kilovat/saata görə 6,71 avro olmaqla Kosovoda istifadə edilib.
Hesabat dövründə Avropa İttifaqında 100 kilovat/saat elektrik enerjisinin dəyəri 28,9 avro təşkil edib ki, bu da Qərbi Balkan regionu ölkələrindəki göstəricidən təxminən üç dəfə çoxdur.
Nihad Budaqov
AZƏRTAC-ın xüsusi müxbiri
Skopye