BANŞ-IN MDB İLƏ ƏLAQƏLƏR KOMİTƏSİNİN İCLASI
Aprelin 12-də Bakıda Beynəlxalq Avtomobil Nəqliyyatı Şurasının MDB ilə Əlaqələr Komitəsinin 9-cu iclası keçirilmişdir.
1948-ci ildə yaradılmış Beynəlxalq Avtomobil Nəqliyyatı Şurası Avropa, Amerika, Asiya və Afrikanın 68 ölkəsinin daxil olduğu qeyri-hökumət təşkilatıdır. O, eyni zamanda BMT-nin məsləhətçi orqanıdır.
İclasın açılışında çıxış edən Şuranın baş katibi M.Marmi Azərbaycanda onlara göstərilən xüsusi qonaqpərvərliyə, tədbirin yüksək səviyyədə təşkil olunmasına minnətdarlığını bildirdi.
“Azəravtonəqliyyat” Dövlət Konserninin prezidenti Hüseyn Hüseynov Azərbaycan hökuməti adından iştirakçılara uğurlu iş arzuladı.
İclasda MDB ölkələrində daşımaların təhlükəsizliyi haqqında sənəd, MDB ölkələrinin Dünya Ticarət Təşkilatına üzv qəbul olunmasının avtomobil nəqliyyatının inkişafına mümkün təsiri, Avropa Birliyinin Ağ kitabı (2010-cu ilə qədər Avropanın nəqliyyat siyasəti) və onun MDB məkanına mümkün təsiri və s. məsələlər geniş müzakirə edildi.
İclas iştirakçıları MDB məkanında daşımaların kriminogen və yol baxımından təhlükəsizliyi, ekoloji problemlər, servis, iaşə və tibbi xidmət, həmçinin digər məsələlərlə bağlı reallaşdırılacaq tədbirlər müəyyənləşdirdilər.
Azərbaycan Prezidenti Heydər Əliyevin təşəbbüsçüsü olduğu qədim İpək yolunun bərpası çərçivəsində TRASEKA layihəsi ilə əlaqədar təkliflər, yeniliklər diqqət mərkəzində oldu.
Moskvada informasiya mərkəzi yaradılması, növbəti iclasın 2002-ci ilin sentyabrında Kiyevdə keçirilməsi qərara alındı.
Bölmənin digər xəbərləri
