Baş məşqçi: İnanıram ki, “Şamaxı”ya qalib gələrək Premyer Liqaya çıxacağıq
Bakı, 15 may, AZƏRTAC
“Şamaxı” ilə matça hazırlıqlarımızı ciddi şəkildə davam etdiririk. Futbolçular da bu oyunun məsuliyyətini çox yaxşı başa düşürlər”.
Bu sözləri AZƏRTAC-a açıqlamasında “Qaradağ Lökbatan” komandasının baş məşqçisi Azər Həşimov I Liqanın 26-cı turunda doğma meydanda “Şamaxı”ya qarşı keçirəcəkləri vacib oyun barədə danışarkən deyib.
Mütəxəssis sabah baş tutacaq matçda qalib gələcəklərinə inandığını bildirib: “Heyətdə ciddi dəyişiklər olmayacaq. Mövsüm ərzində keçirdiyimiz oyunlar kimi, bu görüşə də eyni tərzdə yanaşacağıq. Futbolçularım indiyədək böyük əziyyət çəkiblər. İnanıram ki, “Şamaxı”ya qalib gələrək istədiyimiz yerdə olacağıq”.
Onun sözlərinə görə, komanda Premyer Liqaya vəsiqə qazanarsa, lisenziya məsələsində problem yaranmayacaq: “Rəhbərlik sənəd işləri bağlı tədbir görüb. Əlbəttə ki, çempion olub növbəti mövsüm elitada mübarizə aparmaq istəyirik. Çünki bu mövsüm idman prinsipləri qorundu və “Qəbələ”nin Premyer Liqa ilə vidalaşması öz təsdiqini tapdı”.
Qeyd edək ki, oyun mayın 16-da Lökbatan Olimpiya İdman Kompleksinin stadionunda baş tutacaq. Mövsümün başa çatmasına 2 tur qalmış “Qaradağ Lökbatan” 53 xalla birinci, “Şamaxı” isə 51 xalla ikinci pillədə qərarlaşıb. Reqlamentə əsasən, çempion komanda Premyer Liqaya vəsiqə qazanacaq.
Bölmənin digər xəbərləri
